استانا قالاسىنىڭ اكىمشىلىك قۇقىق بۇزۋشىلىق جونىندەگى مامانداندىرىلعان اۋدانارالىق سوتىندا شىمكەنتتىڭ بۇرىنعى اكىمى مۇرات ايتەنوۆتىڭ اعاسى مارات ايتەنوۆكە قاتىستى ءىس قارالدى.
12 شىلدە كۇنى ايتەنوۆتىڭ ەكس-جۇبايى دانا اتەشوۆا الەۋمەتتىك جەلىدەگى پاراقشاسىندا ءوزىن بالالارىمەن قوسىپ ۇيدەن كۇشتەپ شىعارىپ جاتقانى تۋرالى ۆيدەو جاريالاعان بولاتىن.
"سوت وتىرىسى بارىسىندا قۇقىق بۇزۋشى ءوز كىناسىن مويىنداعان جوق. ول بۇرىنعى جۇبايى بالالارىن بەرۋدەن باس تارتىپ، ولاردىڭ قولدارىنان ۇستاپ جىبەرمەگەنىن ءتۇسىندىردى. ول بالالاردى اكەتۋ ءۇشىن ەدەندە وتىرعان ايەلدىڭ اياقتارىنان تارتقان. ول ادەپسىز ءسوز ايتپاعانىن، ونى ۇرماعانىن اتاپ ءوتتى. وعان جازا تاعايىندالىپ، 5 تاۋلىككە قاماۋعا الىندى. قاۋلى زاڭدى كۇشىنە ەنگەن جوق "، - دەلىنگەن سوت حابارلاماسىندا.
ەسكە سالا كەتەيىك، مارات ايتەنوۆ "استانا" حالىقارالىق قارجى ورتالىعىنىڭ اكىمشىلىگى" اق باسقارما ءتوراعاسىنىڭ ءبىرىنشى ورىنباسارى، "سامۇرىق-قازىنا" ءۇاق اق قوعاممەن بايلانىس جونىندەگى باسقارۋشى ديرەكتور قىزمەتىن اتقارعان. ال ونىڭ ءىنىسى مۇرات ايتەنوۆ 2020-2023 جىلدارى شىمكەنت قالاسىنىڭ اكىمى بولعان.
پىكىر قالدىرۋ