جوعارعى سوت ءتىستى دۇرىس جۇلماعاننىڭ سالدارىنان بالا مۇگەدەك بولىپ قالعان جاعدايعا بايلانىستى مالىمدەمە تاراتىپ، سوت ستوماتولوگيالىق ەمحانادان مورالدىق شىعىن مەن ماتەريالدىق شىعىن ءۇشىن 1،5 ميلليون تەڭگەدەن استام وتەماقى وندىرگەنىن حابارلادى.

جوعارعى سوت مالىمدەمەسىندە وقيعا تومەندەگىدەي باياندالادى.

قىزىلوردا قالاسىنىڭ تۇرعىنى بالاسىنىڭ ءتىسى اۋرۋىنا بايلانىستى ورتالىق قالالىق ەمحانانىڭ بالالار ستوماتولوگياسىنا بارىپ، ءتىس دارىگەرى بالانى ەمدەپ، ءتىسىن جۇلىپ تاستاعان. ەمدەۋدەن كەيىنگى كەلەسى كۇنى بالانىڭ جاق سۇيەگى ءىسىنىپ، دەنساۋلىعى ناشارلاعان. كەيىن بالاعا وبلىستىق كوپسالالى اۋرۋحانانىڭ جاق-بەت بولىمشەسىندە «سول جاق تومەنگى جاقتىڭ جەدەل ءىرىڭدى ودونتوگەندى فلەگموناسى، 7،5 ءتىسىن جۇلعانداعى جاعدايى» دياگنوزىمەن ەكى رەت وتا جاسالعان.

ارادا التى اي وتكەندە بالانىڭ جاق سۇيەگى قايتا ءىسىپ، ءىرىڭدى جاراسى جازىلماعاندىقتان، ولار الماتى قالاسىندا اقىلى نەگىزدە حيرۋرگيالىق ارالاسۋ ارقىلى اۋرۋحانادا ەمدەلۋگە ءماجبۇر بولعان.

مەديسينالىق جانە فارماسيەۆتيكالىق باقىلاۋ دەپارتامەنتى جۇرگىزگەن تەكسەرىس قورىتىندىسىنا سايكەس، ەمحانا ءتىس دارىگەرى كامەلەتكە تولماعان بالاعا مەديسينالىق كومەك كورسەتۋ كەزىندە كلينيكالىق دياگنوستيكا جانە ەمدەۋ حاتتامالارىن ساقتاماعان.

ونىڭ ءتىسىن ورتا مەديسينالىق ءبىلىمى بار ستوماتولوگ الىپ تاستاعان، ەمدەۋ الدىندا جاق سۇيەگىنىڭ رەنتگەنوگرافياسى وبەكتيۆتى تەكسەرىلمەي، اسقىنۋلار - تومەنگى جاقتىڭ قابىنۋ پروسەسى بولعان.

بالانىڭ اناسى ستوماتولوگيالىق ەمحانادان وزىنە كەلتىرىلگەن مورالدىق جانە ماتەريالدىق شىعىندى وتەۋدى سۇراپ، سوتقا جۇگىنگەن.

ول ەمحانا مەديسينا قىزمەتكەرىنىڭ سالعىرتتىعى مەن العاشقى مەديسينالىق كومەكتى دۇرىس كورسەتپەۋىنەن اۋرۋ اسقىنىپ، بالا 2 جىلعا جۋىق ۇيىقتاي الماي، دارىگەرلەردىڭ قورىتىندىسى بويىنشا مۇگەدەك بولىپ قالعانىن كورسەتكەن.

سونداي-اق اقىلى نەگىزدە ءۇش وپەراسيا جاساۋعا، ءتىستى ەمدەۋگە جانە دارىگەرلەردەن كەڭەس الۋعا ءماجبۇر بولعان.

سوت ستوماتولوگيالىق ەمحانادان مورالدىق شىعىن مەن ماتەريالدىق شىعىن ءۇشىن 1،5 ميلليون تەڭگەدەن استام وتەماقى ءوندىرىپ بەرگەن.