ەلىمىزدە تۇرعىن ۇيلەردىڭ كىرەبەرىسىنە تۇرعىن ءۇيدىڭ ماسەلەسىن تالقىلايمىز دەگەن جەلەۋمەن QR كودتار ىلىنگەن. الايدا ول الاياقتاردىڭ ايلاسى بولۋى مۇمكىن دەيدى.

"ۇيىمىزگە قاتىستى ماسەلەلەردى تالقىلاۋعا ارنالعان تەلەگرام ارنا اشىلدى. توپقا قوسىلۋ ءۇشىن تومەندەگى QR-كودقا ءوتىڭىز" دەگەن جازۋمەن قاعاز ىلىنگەن. الايدا ۇلتتىق كومپيۋتەرلىك ينسيدەنتتەرگە ارەكەت ەتۋ ورتالىعى ساراپشىلارىنىڭ ايتۋىنشا، جالعان QR ارقىلى كودتار ۇيالى تەلەفونداعى كونتاكتىلەر مەن جەكە اككاۋنت ايلاكەرلەرگە وتەدى. سوندىقتان پوليسەيلەر جالعان سىلتەمەلەردەن ساق بولۋعا شاقىرادى.

“ءسىز QR كودتى سكانەرلەگەننەن كەيىن سايت اشىلادى. سول سايتتى اشقاننان كەيىن سىزدەن بەلگىلى ءبىر اقپارات سۇرالادى. مىسالى بانك كارتاڭىزدىڭ رەكۆيزيتتەرىن سۇراۋى مۇمكىن. ەگەر ءسىز رەكۆيزيتتەردى ەنگىزسەڭىز، بىردەن الاياقتاردىڭ قولىنا ءتۇسىپ، كارتاڭىزدان اقشانى شەشىپ الۋى مۇمكىن. جەتى رەت ولشەپ، ءبىر رەت كەس دەيدى. سوندىقتان دەرەگىڭىزدى ەنگىزبەس بۇرىن بىرنەشە رەت وزىڭىزگە سۇراق قويىپ، ودان كەيىن عانا شەشىم قابىلداڭىز”، – دەدى اقپاراتتىق قاۋىپسىزدىك مامانى دياس ءابدىعازيزوۆ.

ەگەر جالعان QR-كودتى سكانەرلەسەڭىز، بىردەن بانككە قوڭىراۋ شالىپ، ەسەپشوتتارىڭىزدىڭ قۇپيا ءسوزىن وزگەرتۋىڭىز قاجەت. سونداي-اق ينتەرنەت ارقىلى تولەمنىڭ ءوشىپ تۇرعانىن تەكسەرىڭىز.

قازاقستاندىقتار ءبىر جىلدا الاياقتارعا شامامەن 11 ميلليارد تەڭگەدەن استام اقشاسىن بەرگەن. Finprom.kz. سايتىنىڭ مالىمەتىنە سۇيەنسەك، ايلاكەرلەردىڭ 25% ازاماتتارمەن تەلەفون ارقىلى سويلەسىپ، قارجىسىن جىمقىرعان ەكەن. حالىقتىڭ 18 % جۋىعى الەۋمەتتىك جەلىلەر ارقىلى سان سوعىپ قالعان.