بۇگىن الماتىداعى جازۋشىلار وداعى باسقارماسىنىڭ ادەبيەتشىلەر ۇيىندە جازۋشى، دراماتۋرگ، قازاقستاننىڭ ەڭبەك ەرى دۋلات يسابەكوۆتى اقتىق ساپارعا شىعارىپ سالۋ ءراسىمى ءوتتى.
الدىمەن قازاقستان جازۋشىلار وداعىنىڭ باسقارما ءتوراعاسى مەرەكە قۇلكەنوۆ ءسوز سويلەپ، ءراسىمدى اشىپ بەردى.
جيىندا
مەملەكەتتىك حاتشى ەرلان قارين پرەزيدەنت قاسىم-جومارت توقايەۆتىڭ كوڭىل ايتۋ حاتىن وقىدى.
«دۋلات يسابەك ۇلى ۇلاعاتتى عۇمىرىن ۇلت ادەبيەتىنە ارناعان، تاعىلىمدى تۋىندىلارىمەن وقىرمان ساناسىنا شامشىراق بولا بىلگەن ناعىز دەگدار تۇلعا ەدى. حالقىمىزدىڭ رۋحاني الەمىن بايىتۋدا، ۇلتتىق پروزامىزدىڭ كوكجيەگىن كەڭەيتۋدە ايانباي تەر توگىپ، ونەگەلى ءومىر ءسۇردى. قۋاتتى قالامىنان تۋعان سۇبەلى شىعارمالارى، درامالىق ەڭبەكتەرى الەم ساحنالارىن باعىندىرىپ، دۇنيە جۇزىنە كيەلى ءسوز ونەرىمىزدى دارىپتەدى. سوڭىنا ادەبي مول مۇرا قالدىرعان دۋلات يسابەك ۇلىنىڭ جارقىن بەينەسى مەن ارداقتى ەسىمى حالقىمىزدىڭ جۇرەگىندە ماڭگى ساقتالادى. مارقۇمنىڭ يمانى سالامات، جانى ءجانناتتا بولسىن!» – دەلىنگەن كوڭىل ايتۋ حاتىندا.
ودان بولەك، پرەمەر-مينيستر ولجاس بەكتەنوۆتىڭ، سەنات ءتوراعاسى ماۋلەن اشىمبايەۆتىڭ، ءماجىلىس ءتوراعاسى ەرلان قوشانوۆتىڭ، شىمكەنت، قىزىلوردا، تاراز، شقو، بقو وڭىرلەرىنىڭ وبلىس اكىمدەرىنىڭ كوڭىل ايتۋ حاتتارى وقىلدى.
مارقۇمنىڭ جاقىن دوستارى، بەلگىلى قالامگەرلەر بەكسۇلتان نۇرجەكەيەۆ، تولەن ابدىكتەر مەن نۇرلان ورازالين، ءاسانالى اشىموۆتەر جازۋشىنىڭ شىعارماشىلىعى مەن ءومىرى جايلى جان تەبىرەنتەر ەستەلىكتەرىمەن ءبولىستى.
قازاق ادەبيەتىنىڭ قارا نارى، جازۋشى دۋلات يسابەكوۆپەن قوشتاسۋعا كەلگەن حالىقتىڭ قاراسى دا كوپ بولدى.
پىكىر قالدىرۋ