ەلەكتروندى تەمەكىنى ەلگە اكەلگەنى ءۇشىن شەتەل ازاماتى باس بوستاندىعىنان ايىرىلدى.

بەينەۋ اۋدانىنىڭ سوتى شەتەل ازاماتىن ەلەكتروندىق تۇتىنۋ جۇيەلەرىن (ۆەيپتەردى) ەلگە اكەلگەنى ءۇشىن ق ر قىلمىستىق كودەكسىنىڭ 301-1-بابى 2-بولىگىمەن كىنالى دەپ تانىپ، وعان 1 جىلعا باس بوستاندىعىنان ايىرۋ جازاسىن تاعايىندادى.

"شەكارا بەكەتىن تەكسەرۋ بارىسىندا اۆتوكولىكتىڭ جۇك سالعىشىندا 4 550 دانا "WAKAsoPro20000" ماركالى ەلەكتروندىق تۇتىنۋ جۇيەلەرى انىقتالعان.

زاڭدى كۇشىنە ەنگەن سوت ۇكىمى بويىنشا كورسەتىلگەن تاۋارلار جويۋعا جىبەرىلدى"، - دەلىنگەن حابارلامادا.

قىلمىستىق كودەكستىڭ 301-1 جاڭا بابى تەمەكى بۇيىمدارىنىڭ، ەلەكتروندىق تۇتىنۋ جۇيەلەرىنىڭ (ۆەيپتەردىڭ)، ولارعا ارنالعان حوش يىستەندىرگىشتەر مەن سۇيىقتىقتاردىڭ اينالىمى ءۇشىن جاۋاپكەرشىلىكتى بەلگىلەيدى.

"قۇقىق بۇزۋشىلىقتىڭ اۋىرلىعىنا بايلانىستى ايىپپۇل سالۋ، تۇزەۋ جۇمىستارى، قاماۋعا الۋ نەمەسە ەكى جىلعا دەيىن باس بوستاندىعىنان شەكتەۋ نە ايىرۋ جازالارى قاراستىرىلعان.

ماڭعىستاۋ وبلىسىنىڭ پروكۋراتۋراسى ەلەكتروندى تۇتىنۋ جۇيەلەرىن ساتۋ جانە تاراتۋ قىلمىستىق جاۋاپتىلىققا اكەپ سوعاتىنىن ەسكەرتەدى".