قازاقستان پرەزيدەنتى توقايەۆتىڭ يوردانياعا ساپارى قىزىق ءبىر كەزەڭگە سايكەسىپ قالدى. ەۋروپا مەن اقش-تىڭ ۋكرايناعا قاتىستى ۇستانىمدارىنىڭ اراسىندا قايشىلىق پايدا بولعان تۇس ءقازىر. اقش وكىلدەرى مەن رەسەيلىكتەر كەشە ساۋد ارابياسىندا كەزدەسكەن. پاريجدە الاشاپقىن بولىپ جاتىر. يزرايل مەن «حاماس» الگى اتىستى توقتاتۋ تۋرالى كەلىسىمدى اۋپىرىمدەپ ساقتاپ تۇر. ال توقايەۆ جۇمىس ساپارىمەن بارىپ، كەزدەسكەن ابداللا II وتكەن اپتادا ترامپپەن جولىققان. 

ارينە قازاقستان باسشىسىنىڭ ساپارى وسى وقيعالار قارساڭىندا ادەيى ۇيىمداستىرىلعان جوق. جاي عانا سايكەستىك ەدى. ءبىراق تاياۋ شىعىستا بەدەلى ءبىرشاما جوعارى ساياساتكەرمەن كەزدەسۋدىڭ بىزگە ءبىراز پايداسى بولىپ قالا ما دەپ ۇمىتتەنەمىن. البەتتە پرەزيدەنتتىڭ جۇمىس ساپارىندا ءتۇرلى كەلىسسوزدەر ءوتتى. ءبىراز قۇجاتقا قول قويىلدى. ەل باسشىلارى ەكونوميكادان باستاپ تۋريزمگە، لوگيستيكادان سيفرلاندىرۋعا دەيىن كوپتەگەن ماڭىزدى ماسەلەلەردى تالقىلاعپتى. ادەتتەگىدەي ەكى جاق قازاقستان مەن يوردانيانىڭ سەنىمدى سەرىكتەستەر ەكەنىن اتاپ ءوتىپتى. كەزدەسۋدە ماڭىزدى ەكونوميكالىق ماسەلەلەر دە قارالعان: ونەركاسىپ، ينۆەستيسيا مەن بەيبىت اتوم ەنەرگەتيكاسى سالالارىندا ءبىرقاتار كەلىسىمدەرگە قول قويىلىپتى. ءبىراق ماعان اقوردا تاراتقان مالىمەتتەردىڭ ىشىندەگى: «سونىمەن قاتار مەملەكەت باسشىسى مەن يوردانيا كورولى حالىقارالىق جانە وڭىرلىك قاۋىپسىزدىكتىڭ وزەكتى ماسەلەلەرى جونىندە پىكىر الماستى»،-دەگەن سويلەم قىزىعىراق. البەتتە ەشكىم ءدال وسى سويلەمدى تارقاتىپ ايتپايدى. ديپلوماتيا دەگەننىڭ وزىندە قۇپيا كوپ قوي. سونىڭ ءبىرى بولار. 

جالپى، بىلەتىندەر ابداللا ءىى ترامپپەن ءتاۋىر بايلانىستا دەسەدى. گازا سەكتورىنداعى اتىستى توقتاتۋدا ءبىراز ءرولى بولعانعا ۇقسايدى. ەندى وسى ساياساتكەرمەن ءبىزدىڭ باسشى نە ماسەلەنى ءسوز ەتتى ەكەن دەگەن سۇراق قالدى كوكەيدە. بالكىم قازاقستاننىڭ سىرتقى ساياساتتاعى ۇستانىمدارىن تانىستىرعان شىعار. داۋ-جانجالدى تەك كەلىسىمدەر ارقىلى شەشۋ دەيتىن ۇستانىمدى پىسىقتاعان بولار. ول جاعىن بىلمەيمىن. ءبىراق اراب الەمىندەگى ىقپالدى كۇشپەن ارامىزدىڭ جاقسى بولعانىنان ۇتىلا قويماسپىز.