الماتى قالاسىندا قازاقستاننىڭ باسپا ءسوز كلۋبىندا «سەرۆيس-است» كومپانياسى جۋرناليستەرمەن كەزدەسۋ وتكىزدى.

كومپانيا وكىلدەرى استانانىڭ اۋەجايىن باسقارىپ وتىرعان شەتەلدىك ينۆەستور قازاقستان رەسپۋبليكاسى جوعارعى سوتىنىڭ شەشىمىن ەلەمەيتىنىن ايتىپ، ينۆەستوردىڭ ارەكەتتەرىنە قاتىستى فاكتىلەرى مەن قۇجاتتارىن تانىستىردى.

باسپا ءسوز كلۋبىندا تالقىلانعان ماسەلەگە كەلسەك، كاسىپكەر اينۇر راحيموۆا وسىدان 5 جىل بۇرىن استانا اۋەجايىنداعى 8 شارشى مەترلىك جەردى جالعا الىپ، اقشا ايىرباستاۋ پۋنكتىن اشقان. الايدا شەتەلدىك ينۆەستور نۇرسۇلتان نازاربايەۆ حالىقارالىق اۋەجايىن يەمدەنگەن سوڭ، 10 شاقتى قىزمەتكەرى بار اقشا ايىرباستاۋ پۋنكتىنە ءبىر كۇن بۇرىن عانا ورىندارىن بوساتۋلارىن تالاپ ەتكەن. قازىرگى كەزدە «سەرۆيس-است» كومپانياسىنىڭ ديرەكتورى اينۇر راحيموۆا جوعارى سوتقا بەرىپ، جەڭگەنىمەن، بىرىككەن اراب امىرلىگىنەن كەلگەن شەتەلدىك ينۆەستور قازاقستاننىڭ جوعارى سوتىنىڭ شەشىمىن ورىنداۋعا اسىقپاي وتىرعان كورىنەدى.

–         ­­­­­جاڭا ينۆەستور بىرىككەن اراب امىرلىگىنەن كەلگەن.  ولار باستاپقىدا جالعا الۋ اقىسىنا قانشا بەرە الاتىنىمىزدى سۇرادى. «سىزدەر قانشا دەيسىزدەر، سونشا تولەيمىز» دەدىم تاڭعالىپ. اڭگىمەمىز تەك وسىلاي بىتكەن بولاتىن. ارتىنشا ولار ماعان ءبىر اي بۇرىن ەمەس، ءبىر-اق كۇندە «كەلىسىمشارت قۇجاتىن ءارى قاراي سوزا المايمىز. ءسىزدىڭ نۇكتەنى تىكەلەي باسەكەلەسىڭىزگە بەرەمىز. مىنا جەردى بوسات!» دەدى اياقاستىنان. ال مەنىڭ قاراماعىمدا 10-نان اسا قىزمەتكەر بولاتىن.  بارلىعى دا ءبىر كۇندە جۇمىسسىز قالدى. ونىڭ ۇستىنە، سول ۋاقىتتا الەمدە پاندەميا بولىپ جاتقان. وسىلايشا، كوپ جىل بويعى ىستەپ جاتقان كاسىبىمىز قۇلدىراپ كەتتى. قازىرگى ۋاقىتتا قىزمەتكەرلەرىمىزدىڭ ءبىرى كافەلەردە ىدىس جۋىپ، ءبىرى جەتكىزۋشى (كۋرەر) بولىپ، جان جاققا ىدىراپ كەتتى. قىزمەتكەرلەرىمنىڭ بارلىعى دا جالعىزباستى انالار. جاڭا ينۆەستوردىڭ كەسىرىنەن ولار ءارتۇرلى اۋىر جۇمىستاردى ىستەپ ءجۇر. نەگە ولار قينالۋ كەرەك؟ زاڭ بارىنە ورتاق ەمەس پە؟. قۇقىمىزدى تالاپ ەتىپ، سوتقا بەرسەك تە اۋەجاي اكىمشىلىگى ەلەمەي وتىر»، – دەيدى كاسىپكەر اينۇر راحيموۆا.

ال كاسىپكەردىڭ قورعاۋشىسى الماگۇل مۋسسينا
اۋەجاي اكىمشىلىگى جوعارى سوتتىڭ شەشىمى شىقسا دا ورىنداۋعا اسىقپاي وتىرعاندارىن ايتادى.

-         سوتتىڭ شەشىمى 2024 جىلدىڭ 5 قاراشاسىندا كۇشىنە ەندى. سول ۋاقىتتان باستاپ شەتەلدىك ينۆەستور سوتتىڭ شەشىمىن ورىنداۋ كەرەك ەدى. جوعارى سوت 18 اقپاندا قاراپ، جاۋاپتى قاناعاتتاندىرعان بولاتىن. الايدا اۋەجاي اكىمشىلىگى سوتتىڭ شەشىمىن ورىنداۋعا اسىعار ەمەس. ونىڭ سەبەبىن دە ايتپاي وتىر. سوت ءبىزدىڭ مۇددەمىزگە شەشىم شىعاردى، ورنىمىزدى بەرىڭىزدەر دەسەك، باسقا جەردەن ورىن بەرەيىك دەپ، زاڭعا قارسى شىعىپ وتىر»، – دەيدى قورعاۋشى الما مۋسينا.

ەكونوميست-ساراپشى ماقسات حالىق ادىللەتتىك پرينسيپتەرى بۇزىلىپ وتىرعانىن ايتادى.

– ءبىرىنشى كەزەكتە اۋەجاي اكىمشىلىگە جالعا الۋشى كاسىپكەرلەرگە ورىندارىن بوساتۋى جونىندە الدىن الا ەسكەرتۋلەرى كەرەك ەدى. ەسكەرتۋ ۇدەرىسىنىڭ بولماۋىنىڭ ءوزى زاڭعا قايشى كەلىپ وتىرعاندارىن بىلدىرەدى. ماسەلەن، شەتەلدىك ازاماتتارعا قاتىستى ايتار بولسام، «تارتىپكە باعىنعان قۇل بولمايدى» دەپ باۋىرجان مومىش ۇلى ايتپاقشى، ءار ەلدىڭ ءوز ءتارتىبى بار. قانشا جەردەن سوت دۇرىس شەشىم شىعارىپ وتىرعانىمەن، ءارى سوتتىڭ ناقتى شەشىمى بار بولا تۇرا ول ۇدەرىس ءالى جۇزەگە اسپاي وتىر. سوندا زاڭنىڭ ۇستەمدىگى قۇرتىلىپ وتىر. زاڭنىڭ ۇستەمدىگى بولماسا، وندا ەلىمىزدە ىسكەرلىك بەلسەندىلىك تۇسە بەرەدى. ىسكەرلىك بەلسەندىلىك تۇسەتىن بولسا، ەكونوميكامىز دا قۇلدىرايدى. ەگەر دە ەكونوميكامىزدى دامىتامىز دەسەك، ءبىرىنشى كەزەكتە بيزنەستىڭ قۇقىقتىق ورتاسى ساقتالۋى كەرەك. ەكىنشى كەزەكتە، زاڭنىڭ ۇستەمدىگى ورىندالۋى كەرەك. سول كەزدە ادىلەتتىلىك پرينسيپتەرى دە جۇزەگە اسادى. ءارى كاسىپكەرلەرىمىز دە وزدەرىن قورعاي الادى. بۇلاي جالعاسا بەرسە، ەرتەڭ باسەكەگە قابىلەتتى كاسىپكەرلەرىمىزدەن ايرىلامىز، – دەيدى ماقسات حالىق.

جۋرناليستەردىڭ «اۋەجاي اكىمشىلىگى ۇسىنعان باسقا ورىنعا نە سەبەپتى اۋىسپايسىزدار؟ دەگەن سۇراعىنا كاسىپكەر اينۇر راحيموۆا:

–        بۇل ورىن ءبىزدىڭ بۇرىننان وتىرعان ورنىمىز ەدى. ءارى بىزگە ۇيرەنىپ قالعان تۇتىنۋشىلارىمىز دا بار. ءالى كۇنگە دەيىن «سىزدەر قايدا كوشىپ كەتتىڭىزدەر؟ بىزگە سىزدەردىڭ قىزمەتتەرىڭىز ۇنايتىن ەدى» دەپ حابارلاسىپ جاتادى. سونداي-اق نە سەبەپتەن جاڭا ينۆەستور كەلە سالىپ، ەش سەبەبىن ايتپاستان، اياقاستىنان «ورىندى بوساتىڭدار» دەپ ايتۋى دا دۇرىس ەمەس، – دەپ جاۋاپ بەردى.  

سونىمەن قاتار كاسىپكەر وسى ۋاقىتقا دەيىن سوتقا شاعىم ءتۇسىرىپ، ءتىپتى جوعارى سوتقا دەيىن قاتىسىپ، جەڭسە دە، ءالى كۇنگە جوعارى سوتتىڭ شەشىمى ورىندالماي وتىرعانىنا نارازىلىعىن ءبىلدىردى.

 ­– قازاقستاننىڭ ازاماتى بولا تۇرىپ، قازاقستاننىڭ جەرىندە كاسىپتەرىنە بىرىككەن اراب امىرلىگىنەن كەلگەن شەتەلدەگى ينۆەستور ءبىزدىڭ زاڭىمىزعا باعىنباي، جوعارى سوتىمىزدىڭ شەشىمىن ەلەمەي وتىرعانى نامىسقا تيەدى، – دەپ ءسوزىن اياقتادى كاسىپكەر اينۇر راحيموۆا.