الەۋمەتتىك جەلىلەر مەن مەسسەندجەرلەردە "قازاقستان ازاماتتارىنا، 1949–2010 جىلدار ارالىعىندا تۋعاندار ءۇشىن، 70 000 تەڭگە كولەمىندە تولەم جاسالادى" دەگەن اقپارات تاراپ جاتىر. الايدا ەڭبەك جانە حالىقتى الەۋمەتتىك قورعاۋ مينيسترلىگى بۇل اقپاراتتىڭ شىندىققا جاناسپايتىنىن مالىمدەدى. 

"الەۋمەتتىك جەلىلەر مەن مەسسەندجەرلەردە تاراپ جاتقان 70 000 تەڭگە كولەمىندەگى تولەم تۋرالى اقپارات شىندىققا سايكەس كەلمەيدى. بەلگىسىز تۇلعالار ازاماتتارعا سىلتەمە ارقىلى ءوتىپ، ءوتىنىم بەرۋىن ۇسىنادى"، – دەلىنگەن مينيسترلىك حابارلاماسىندا.

مينيسترلىك الاياقتار جىبەرىلگەن سىلتەمە ارقىلى جەكە مالىمەتتەردى ۇرلاۋى مۇمكىن ەكەنىن ايتىپ ەسكەرتۋ جاسادى. 

"سىلتەمەگە ەش جاعدايدا وتپەڭىز؛ رەسمي اقپارات تەك 1414 نومىرىنەن كەلەتىن SMS ارقىلى تاراتىلادى؛ اقپاراتتى تەك رەسمي دەرەككوزدەردەن عانا تەكسەرىڭىز؛ جالعان اقپارات تاراتقاندار زاڭمەن قۋدالانادى"، دەلىنگەن حابارلامادا.