بۇگىن، 18 تامىزدا الماتىدا تۇركى مەملەكەتتەرى ۇيىمىنىڭ (تمۇ) IV حالىقارالىق جاستار فەستيۆالىنىڭ رەسمي اشىلۋ سالتاناتى ءوتتى. ءىس-شارا بارىسىندا قالاعا «2025 جىلعى تۇركى الەمىنىڭ جاستار استاناسى» مارتەبەسى بەرىلدى.

ءىس-شاراعا تمۇ باس حاتشىسى كۋبانىچبەك ومۋرالييەۆ، ق ر مادەنيەت جانە اقپارات ءمينيسترى ايدا بالايەۆا، الماتى قالاسىنىڭ اكىمى دارحان ساتىبالدى جانە تمۇ-عا مۇشە ەلدەردىڭ بەلسەندى جاستارى قاتىستى.

مەملەكەت باسشىسى قاسىم-جومارت توقايەۆ ارنايى قۇتتىقتاۋ حاتىن جولدادى.

“الماتى – ازاتتىعىمىزدىڭ التىن بەسىگى، جاسامپاز جاستاردىڭ قۇتتى مەكەنى. وركەنيەتىمىزدىڭ ءورىسىن كەڭەيتۋگە ولشەۋسىز ۇلەس قوسقان كوپتەگەن ۇلى تۇلعالارىمىز وسى قالادا وسىپ-ونگەن. شىن مانىندە، ءتول مادەنيەتىمىزدىڭ تەمىرقازىعىنا اينالعان شەجىرەلى شاھار قازاق ەلىنىڭ عانا ەمەس، تۇركى مەملەكەتتەرىنىڭ دە رۋحاني ورداسى سانالادى” دەلىنگەن قۇتتىقتاۋ حاتىندا.

سالتاناتتى ءىس-شارا اياسىندا باۋىرلاستىقتىڭ، سەنىم مەن جاڭا مۇمكىندىكتەردىڭ نىشانىنا اينالعان جاستار استاناسى كىلتىن 2024 جىلعى جاستار استاناسى - لەنكوران قالاسى، ازەربايجان ەلىنىڭ وكىلدەرى الماتى جاستارىنا تابىستاپ، باۋىرلاستىق ەستافەتاسىن جالعادى. 

ايتا كەتەيىك، حالىقارالىق فەستيۆال ق ر مادەنيەت جانە اقپارات مينيسترلىگىنىڭ جانە الماتى قالاسى اكىمدىگىنىڭ قولداۋىمەن ءوتىپ جاتىر.

فەستيۆال ەكى كۇنگە جالعاسىپ، تۇركى مەملەكەتتەرى ۇيىمىنا مۇشە – قازاقستان، ازەربايجان، قىرعىزستان، تۇركيا جانە وزبەكستاننان كەلگەن دەلەگاتتار جاستار ساياساتى، كاسىپكەرلىك، ازاماتتىق بەلسەندىلىك جانە الەۋمەتتىك باستامالاردى دامىتۋ تاجىريبەلەرىمەن بولىسەدى. 

سونداي-اق جاس كوشباسشىلار مەن كاسىپكەرلەردىڭ كەزدەسۋى وتەدى.