فرانسيا پرەزيدەنتى ەۋروپالىق قارۋلى كۇشتەر سوعىس اياقتالعاننان كەيىن ۋكرايناداعى بىتىمگەرشىلىك وپەراسيالارىنا قاتىسۋى كەرەك دەپ مالىمدەدى. بۇل تۋرالى ول كەشەگى ۆاشينگتوندا وتكەن جۋرناليستەرمەن كەزدەسۋدە ايتتى.
"بىزگە مىقتى ۋكراينالىق اسكەر قاجەت بولادى جانە ءبىز ۋكرايناعا كومەكتەسۋىمىز كەرەك"، دەدى ماكرون.
رەسەي تاراپى بولسا ۋكراينا اۋماعىندا باتىس اسكەرلەرىن ورنالاستىرۋ يدەياسىنا قارسى. ماكرون كەلىسسوز ءساتسىز اياقتالعان جاعدايدا رەسەيگە قارسى سانكسيانى كۇشەيتۋ كەرەگىن ايتتى.
"ءبىز سانكسيانى كۇشەيتۋ كەرەك دەپ ويلايمىز. كەز كەلگەن جاعدايدا رەسەيگە قارسى قىسىمدى كۇشەيتەتىن پوزيسيانى ۇستانۋعا تۋرا كەلەدى"، دەدى ەممانۋەل ماكرون.
بۇدان بولەك فرانسيا پرەزيدەنتى ۆلاديمير زەلەنسكيي جانە باسقا دا ەۋروپالىق ليدەرلەرمەن وتكەن "ەرىكتىلەر كواليزاسياسى" (ساياسي سيپاتتاعى بەلگىلى ءبىر ماقساتقا جەتۋ ءۇشىن قۇرىلعان ۋاقىتشا حالىقارالىق سەرىكتەستىك - رەد.) ۆيدەوكونفەرەنسياسىنان كەيىن مالىمدەمە جاسادى:
"ەگەر رەسەيدىڭ الدىندا السىزدىك تانىتاتىن بولساق الداعى ۋاقىتتا دا قاقتىعىسقا جول اشادى. ءبىز بۇگىن ءالسىز بولساق، ەرتەڭ مۇنىڭ زاردابىن تارتاتىن بولامىز. ەگەر ەۋروپا ەركىن ءارى تاۋەلسىز بولعىسى كەلسە ءقازىر دە مىقتى ءارى باسقالارعا ۇرەي سالاتىن كونتينەنت بولۋى كەرەك"، دەدى فرانسيا پرەزيدەنتى.
بۇدان بولەك ماكرون قالعان اۋماقتىڭ قاۋىپسىزدىگىنە كوز جەتكىزبەي تۇرىپ رەسەي مەن ۋكراينانىڭ ايماقتىق الماسۋ شارتىن جاساسۋىنا ەشبىر مەملەكەت كەلىسىم بەرمەيتىنىن ايتتى.
