الماتى وبلىسى ەلىمىزدىڭ الدىڭعى قاتارلى يندۋستريالىق وڭىرلەرىنىڭ ءبىرى رەتىندە ءوز پوزيسياسىن نىعايتىپ كەلەدى. سوڭعى ءۇش جارىم جىلدا وڭىردە 6،7 ترلن تەڭگەنىڭ ءونىمى ءوندىرىلدى. 2024 جىلى ونەركاسىپ ءوندىرىسىنىڭ كولەمى 2021 جىلمەن سالىستىرعاندا 1،5 ەسە ارتتى. اعىمداعى جىلدىڭ جەتى ايىنىڭ قورىتىندىسى بويىنشا ونەركاسىپ ءوندىرىسىنىڭ يندەكسى 106،6%-دى قۇرادى.
وبلىس اكىمى مارات سۇلتانعازييەۆ دامۋدىڭ باسىم باعىتى شيكىزاتتىق ەمەس ەكونوميكا بولىپ قالا بەرەتىنىن اتاپ ءوتتى: «وسى باعىت تۇراقتى يندۋستريالىق بازا قالىپتاستىرۋعا جانە جاڭا وندىرىستەردى دامىتۋعا مۇمكىندىك بەرەدى».
ءوڭىر ازىق-تۇلىك ونەركاسىبىندە جەتەكشى ورىنعا يە: ەلىمىزدەگى كوكونىس شىرىندارىنىڭ 96%-ى، بالمۇزداقتىڭ ۇشتەن ەكىسى جانە سۇزبەنىڭ جارتىسى الماتى وبلىسىندا وندىرىلەدى. بۇدان بولەك، مۇندا گيپسوكارتون ءوندىرىسىنىڭ 80%-ى شوعىرلانعان، ەلدەگى جالعىز تەمەكى يندۋسترياسىنىڭ ورتالىعى جۇمىس ىستەيدى جانە وتاندىق دارى-دارمەك ءوندىرىسىنىڭ 24%-ى قامتاماسىز ەتىلەدى.
2025 جىلى قۇنى 80 ملرد تەڭگە بولاتىن كورەيالىق KT&G كومپانياسىنىڭ زاۋىتى ىسكە قوسىلىپ، 300 جاڭا جۇمىس ورنى اشىلدى. اۋىل شارۋاشىلىعى جالپى رەسپۋبليكالىق كولەمنىڭ 12%-ىن قۇرايدى، ال سوڭعى ءۇش جىلدا شيكىزاتتىق ەمەس ەكسپورت كولەمى 2 ملرد اقش دوللارىنا جۋىقتاپ، 2021 جىلمەن سالىستىرعاندا ءۇش ەسەگە ارتتى.
ىسكە اسىرىلعان ينۆەستيسيالىق جوبالاردىڭ قاتارىندا — Jiangxi Copper كومپانياسىنىڭ ۆولفرامدى قايتا وڭدەۋ جوباسى (135 ملرد تەڭگە)، Almaty Insulation جىلۋ وقشاۋلاعىش زاۋىتىنىڭ قۇرىلىسى (43،8 ملرد تەڭگە) جانە Focus Logistics قويما كەشەندەرى (70 ملرد تەڭگەگە دەيىن).
2025 جىلدىڭ سوڭىنا دەيىن الماتى وبلىسىندا جالپى قۇنى 1،3 ترلن تەڭگەنى قۇرايتىن 35 جاڭا جوبا ىسكە قوسىلادى. ولاردىڭ ىشىندە — PepsiCo كومپانياسىنىڭ Lay’s زاۋىتى (71 ملرد تەڭگە)، LC Waikiki تاراتىلىم ورتالىعى (30 ملرد تەڭگە)، Qazaq Global Food زاۋىتى (16،5 ملرد تەڭگە) بار.
ەنەرگەتيكا سالاسىنا دا ەرەكشە كوڭىل بولىنۋدە. شەلەك اۋدانىندا قۋاتتىلىعى 60 مۆت جەل ەلەكتر ستانسياسى، قونايەۆ قالاسىندا 110 مۆت ەلەكتر ستانسياسى پايدالانۋعا بەرىلۋدە. بۇل شارالار ەنەرگيا تاپشىلىعىن ازايتىپ، ءوڭىردىڭ ونەركاسىپتىك ءوسىمىن قولدايدى.
الماتى وبلىسى يندۋستريالىق، اگرارلىق جانە ەكسپورتتىق الەۋەتىن نىعايتىپ، ءوڭىر مەن ەل ەكونوميكاسىنىڭ تۇراقتى دامۋىنا سەرپىن بەرۋدە.
