قارا حالىق قاشاندا زيالى قاۋىمعا قاراپ، سولاردىڭ ارتىنان ەرەدى. وتكەن عاسىرلاردا باتىرلارىمىز بەن بي-شەشەندەرىمىزدى تىڭداپ، سال سەرىلەرىمىزدى قۇرمەتتەپ كەلدى. ول زاماننىڭ زيالىلارى ۇرپاقتار اراسىندا قازاققا ءتان ۇلتتىق بەلگىلەرىمەن قالىپ، عاسىردان عاسىرعا جەتەرى انىق. وتكەن عاسىردا دا حالىقتىڭ باعدارشامى اقىن جازۋشىلارىمىز بولىپ كەلگەن. ال بۇگىن شە؟ بۇگىن ءبىز كىمگە قاراپ بوي تۇزەيمىز؟ بۇگىن حالىق كىمدى تىڭداپ، كىمنىڭ ارتىنان ەرەدى؟ شىنىمەن، بۇل سۇراقتارعا كەلگەندە ويلانىپ قالاسىز.

مەنىڭشە، قازىرگىنىڭ ەڭ بەدەلدى ادامدارى باتىر دا، بي-شەشەن دە، اقىن-جازۋشى دا ەمەس. ولار – «جۇلدىز» دەگەن اتقا يە ادامدار. اسىرەسە، بۇگىنگى ەڭ داڭىقتى جۇلدىز – ۇلتتىق تامىرىنان اجىراعان ادامدار. قانشالىقتى سول اتقا تەز جەتۋ ءۇشىن ەلدى تاڭداندىرىپ، وزىڭە ۇيىتا الۋىڭ كەرەك. تاڭداندىر جولى ۇلتىڭنىڭ داستۇرىمەن ادامدى تاربيەلەۋ ماقساتىنا ەمەس، جىن ويناقپەن ازدىرىپ، ەسىنەن تاندىرىپ ەسسىزدىككە اپارۋ. حالىقتىڭ ەسىنەن ايىرىلىپ، تامىرىنان الشاقتاعانى بيلىك ءۇشىن دە ءتيىمدى. سوندىقتان، ءبىزدىڭ ەلدە سولارعا جول اشىق. ءتىپتى، ەلىمىزدىڭ مادەنيەت وشاعى بولىپ سانالاتىن الماتىدا ەسىموۆ اكىم بولعان 8 جىلدىڭ ىشىندە مەرەكەلىك ءىس شارالارعا قالانىڭ ساحاناسىنا بىردە-بىر ءداستۇرلى ورىنداۋشى شىقپاعان ەكەن. باۋىرجان بايبەكتىڭ كەلگەنىنە دە 3 ايدىڭ ءجۇزى بولدى. ءۇمىت كۇتىپ ەدىك، اقتالمادى. قايتا  كيەلى ساحاناعا سايلاۋبەك شىعىپ كەتتى.

وزگە «جۇلدىزدار» تۋرالى ايتىپ ءسوزدى كوبەيتە بەرمەيىن. بۇگىنىڭ ەڭ تانىمال «جۇلدىزى» وسى سايلاۋبەك بولىپ تۇر. بەيمالىم ومىردەن كەلگەن، بەيمالىم تىلدەگى ولەڭىمەن تىڭداۋشىلارىنىڭ سۇيىكتىسنە اينالعان جىگىت – جانكۇيەرلەرىنە كوپتىگى جاعىنان ەركىن شۇكىمان، رامازان ستامعازييەۆ سياقتى ءداستۇرلى ءاننىڭ ساڭلاقتارى مەن اتاقتى «مۋزارت» ءانسامبلى تۇرماق، بۇگىنگى ەستاردا جۇلدىزدارى  قايرات نۇرتاس پەن ەرنار ايداردى دا جولدا قالدىردى.

كەشە سول اتى شۋلى سايلاۋبەكتىڭ «قايرات» كومانداسىنىڭ تۋىن اياعىنا تاپتاعانى تۋرالى سۋرەت الەۋمەتتىك جەلىلەردە تارادى. سايلاۋبەكتى سىناعان ادامداردان كورى ونىڭ بۇل ءىسىن اقتاپ ونى قورعاشتاعانداردىڭ سانى اناعۇرلىم جوعارى بولدى. بۇدان، سايلاۋبەكتىڭ قولداۋشىلارىنىڭ، سايلاۋبەك «قايراتتىڭ» ەمەس، قازاقتىڭ تۋىن تاپتاسا دا قورعاپ الۋعا دايىن ەكەنىن كورسەتىپ، ءبىزدى قورقىتىپ تاستادى. قورىقپاي قايتەمىز؟، «قايراتتىڭ تۋى مەملەكەتتىك تۋ ەمەس قوي»،- دەگەن جانكۇيەرلەردىڭ اپتىققان تۇرىنەن، ولاردىڭ سايلاۋبەك ءۇشىن نەگە بولسادا بارۋعا دايىن ءتۇرىن كورۋگە بولادى.

قوعامدا سايلاۋبەك بىرەۋ عانا ەمەس. جۇلدىز بولىپ جۇرگەن تالاي سايلاۋبەكتەر بار. ولاردىڭ ارتىندا مىڭداعان، ميلليونداعان قولداۋشىلارى بار. ءبىراق، وزدەرىندە سول قولداشىلاردى ارتىنان دۇرىس ەرتە الاتىن اقىل-پاراسات پەن وزىندىك ۇستانىمى، پىكىرى، ءوز ويى جوق. وزگە بىرەۋدىڭ سىلتەگەن جولىمەن ءجۇرىپ، نۇسقاۋىن تىڭداپ كەشەگى سايلاۋبەكشە وت باسىپ، ارتىنان كەشىرىم سۇراپ قۇتىلادى. سايلاۋبەكتىڭ كەشەگىسى شىندا جانكۇيەرلەرى ايتقانداي ءجاي عانا نارسە شىعار. ءبىراق ونداي ارتىندا ميلليونداعان اسكەرى بار، ءوزىنىڭ قولباسشىلىق قابىلەتى جوق ادامدى كىم دە بولسا ءوز ماقساتىنا پايلانىپ، قارۋ رەتىندە جۇمسايتىنى انىق. وسى كەزدە  بەلگىلى ءبىر قوعامدىق ءىس شارالار بولسىن، ۇكىمەتكە، بيلىككە حالىقتىڭ قال ءجايىن مەن ۇلتتىڭ تاعدىرىن ايتىپ شىققان نارازىلىق شارالار بولسىن قاي ءبىر قوعام قايراتكەرىنىڭ ارتىنان اسىپ كەتكەندە 100 ادام عانا ەرەدى. ال، بۇل جۇلدىزدار شىقسا تاۋ قوپارىپ تاستاۋعا شامالارى جەتەدى.

جۇلدىزدىڭ ءومىرى قىزىقتىرعان قوعام ءۇشىن جۇلدىزدان قورقىنىشتى ەشكىم جوق. ەگەر، تانىم مەن تالعام تارازىسى بولماي، قولدان جاسالعان جۇلدىزدار كوبەيىپ كەتسە ويدا جوقتا وپىق جەۋىمىز مۇمكىن. بۇل قورقىنىش تەك بىزدە عانا ەمەس، بيلىكتە دە بولعانى ءجون. ويتكەنى، سالماقسىز قاڭباق قاي جاقتان جەل شىقسا، سول جەلدىڭ باعىتىمەن دومالاي بەرمەك. جاۋ كەتكەن سوڭ قىلىشىمىزدى بىلعاپ جۇرمەۋ ءۇشىن وسى باستان ب ا ق جۇلدىزىمىز بەن سورىمىز بولاتىن جۇلدىزداردى اجىراتىپ الايىق.

تۇردىبەك قۇرمەتحان