Qazaqstan Respýblıkasy Parlamenti Májilisine saılaýdyń aldyn ala qorytyndylary boıynsha úsh saıası partıa ótti, - dep habarlaıdy «Qamshy» portaly.

Búgin QR Parlamenti Májilisi  saılaýynyń aldyn ala qorytyndysyn jarıalaǵan QR Ortalyq saılaý komısıasynyń tóraǵasy Qýandyq Turǵanqulov osylaı málimdedi.

«20 naýryz kúni elimizde úlken saıası naýqan óz máresine jetti. Qazirgi ýaqytta Ortalyq saılaý komısıasyna kelip túsken málimetterge sáıkes partıalyq tizimder boıynsha saılanatyn Qazaqstan Respýblıkasy Parlamenti Májilisiniń depýtattaryn saılaýda saılaýshylar daýysy jarıa etiledi», - dedi ol.

Sonymen saılaýdyń aldyn ala qorytyndysy boıynsha:

«Nur Otan» partıasy - 82,15;

Qazaqstan Komýnıstik halyq partıasy - 7,14;

Qazaqstannyń «AQ JOL» Demokratıalyq partıasy - 7,18;

«Birlik» Saıası partıasy - 0,29;

Jalpyulttyq sosıal-demokratıalyq partıa - 1,18;

«Aýyl» Halyqtyq-demokratıalyq partıottyq partıasy - 2 paıyz daýys jınaǵan.

«Osylaısha, Parlament Májilisine óz úmitkerlerin usynǵan 6 saıası partıanyń úsheýi saılaý týraly zańda kórsetilgen 7 paıyzdyq mejeden ótti. Olar: «Nur Otan» partıasy, Qazaqstannyń «Aq jol» Demokratıalyq partıasy men Qazaqstan komýnıstik halyq partıasy»», - deıdi OSK basshysy.
Q. Turǵanqulovtyń aıtýynsha, Ortalyq saılaý komısıasy partıalyq tizimder boıynsha saılanatyn Májilis depýtattaryn saılaýdyń sońǵy qorytyndylaryn aýmaqtyq saılaý komısıalary hattamalarynyń negizinde 2016 jylǵy 26 naýryzdan keshiktirmeı belgileýi tıis.

Keshe eriktiler ótkizgen Exit poll nátıjeleri jarıalanyp, ol boıynsha «Nur Otan» partıasy – 82, QHKP – 7,17, «Aqjol» QDP – 7,22, «Birlik» partıasy – 0,35, JSDP – 1,21, «Aýyl» partıasy – 2,05 paıyz daýys jınaǵandyǵy habarlanǵan edi.

Sóıtip, OSK taratqan resmı málimetter de Exit poll nátıjesinen alysqa uzaı qoımady.