Juma kúni Qyrǵyzstan men Ózbekstan shekarasyndaǵy Qyrǵyzstannyń Jalal-abad oblysy Moǵol Ala Buǵy aýdanyndaǵy shekara ýchaskesine Ózbekstan tarapynan eki BTR tehnıkasy men eki Kamaz kóligi qoıylǵan. Sonymen birge, 40 shaqty ózbek jaýyngeri de qyrǵyz jerine basyp kirgen bolatyn.  Ózbekstan taraby bir jaqty sheshimmen shekaradaǵy «Mádenıet» baqylaý-ótkizý beketin de jaýyp tastaǵan. Al, «Dostyq» avtobeketinde kólik pen azamattardyń ótýine shekteý jasaǵan. Ol shekteý boıynsha qyrǵyz azamattarynyń Ózbekstannan shyǵýyna ruqsat berilip, Ózbekstanǵa kirýine tosqaýyl qoıylýda. Alaıda, ózbek azamattaryna mundaı shekteý qoıylmaǵan.

Búgin Qyrǵyzstan tarapynyń da shekaraǵa qosymsha kúsh baǵyttaǵany belgili bolyp otyr. Qyrǵyzstannyń memlekettik shekara qyzmeti Ózbekstanmen shekaraǵa saýytty tehnıkalaryn jibergen.

«Qyrǵyzstannyń memlekettik shekara qyzmeti ózbek tarapynyń áreketterine baılanysty Jalal Abad oblysy Chalasart Aqsı aýdanynda qaýipsizdikti qamtamasyz etý úshin shara qabyldap otyr: shekaranyń atalǵan ýchaskesinde qazir Qyrǵyzstan memlekettik shekara qyzmetinen eki BTR tehnıkasy men arnaıy jasaq bólindi», - delinge Qyrǵyzstannyń memlekettik shekara qyzmeti taratqan habarlamada.

Qyrǵyzstan tarapy sondaı-aq, aqparat quraldarynda shekarada atys boldy degen habardyń shyndyqqa janaspaıtynyn málimdedi.

«18-20 naýryz aralyǵynda memlekettik shekaranyń atalǵan ýchaskesinde qarý qoldaný oqıǵasy bolǵan joq», - delingen habarlamada.

Qyrǵyz BAQ-tary shekaradaǵy ahýal arnaıy qyzmetterdiń tolyq baqylaýynda ekendigin jáne eki memleket ókilderiniń kelissózderi júrip jatqanyn habarlaýda. Ol kelissózde qyrǵyz eli Ózbekstannan aýyr tehnıka men áskerılerdi shekara ýchaskesinen alyp ketýdi talap etýde.

Jergilikti turǵyndar da Ózbekstan tarapynyń bul áreketine narazylyq bildirýde.