Jemqorlyqpen kúres kúsheıse de, laýazymdy tulǵalar memlekettik baǵdarlamaǵa bólingen qarjyny qaltalaryna salar ádetterinen aryla almaı otyr. Bul joly qarjy polısıasy, sýǵa bólingen bir jarym mıllıard teńgeni talan-tarajqa salǵan sý resýrstary komıtetiniń laýazymdy ókilderiniń ústinen qylmystyq is qozǵady. Al, redaksıamyzǵa "aýyz sýymyz joq" dep kúnine on aýyldyń turǵyndary qońyraý shalady. Ataǵymyz alty qurlyqqa jetti dep, maqtanatyn elimizdiń alty tamshy sýǵa nege jarymaı otyrǵanyn Lımara Salıh anyqtap kórgen edi.

Armanǵa aınalǵan aýyz sý. Almaty oblysy, Pervomaı kentiniń turǵyndary, sýdyń syldyryn saǵynǵan. Kóktem kelgen saıyn, qubyrlaryndaǵy sý toqtap, qudyqtar qýrap kalady dep ashynady azamattar. Kópshilik sýsyz ómirleriniń sebebin bilgileri keledi, alaıda, jaǵdaıdy jaı-japsaryna jetkizip berer jaǵalylar joq deıdi. Tipti, tirshilik nárine zárý bolǵan buqara, aýyz sýdy alý úshin tekshesine toqsan bes teńgeden tólep otyrǵan kórinedi. Aýyz sýǵa aqsha aıar azamat joq. Tek tirshilik nárinsiz qaldyrmasa bolǵany deıdi. NATALÁ SALECHINA, ALMATY OBLYSY İLE AÝDANY PERVOMAIKA AÝYLDYQ OKRÝGİNİŃ TURǴYNY: -Túnde tamshylap aqqan sýdy jınap alyp, sol sýmen kir jýamyz, ózimiz jýynamyz, áıteýir ólmestiń kúnin kórip júrmiz. Almaty aýmaǵyndaǵy shaǵynaýdan halqy da, 12 jyldan beri aýyz sýdy surap iship otyr. Qaltasynda qarjysy barlar, sý tasıtyn kóliktiń kelgenin ańdıdy. BOLATBEK BEIİMBETOV, ALMATY QALASY QALQAMAN 3 SHAǴYNAÝDANYNYŃ TURǴYNY: -2000 jyly kóship keldik. Sodan beri bir adam qusap sý iship kórgen joqpyz. BOTAGÓZ NURQALIEVA, ALMATY QALASY QALQAMAN 3 SHAǴYNAÝDANYNYŃ TURǴYNY: -Bıyl baryp edik, ákimniń orynbasary úsh saýsaqtan bir fıgýra kórsetip, sý berilmeıdi dedi. Al, ózge de aımaqtardaǵy aýyz sý máselesi máz emes. Keı jerlerde, tipti "Aýyz sý" memlekettik baǵdarlamasy boıynsha sý qubyrlary tartylǵanymen, tirshilik nári jetpepti. Bul jaǵdaı qaraǵandydaǵa Dýbovka aýylyna baınalysty. Jyl bysynda basshylar, aýyldaǵy sý júıesi qaıta jóndeýden ótti dep súıinshi suraǵan-dy. Alaıda, qubyrdyń otyz paıyzyna kúrdeli jóndeýdiń qajet ekeni kóp uzamaı anyq boldy. VERA CHEBOTAR, DÝBOVKA AÝYLYNYŃ TURǴYNY: -Biz múldem úıde shomylý degendi utymqaly qashan? Týysqandarymyzdyń úıine baramyz. Sýdy kórmegeli kóp boldy. 2002-2010-shy jyldarǵa arnalǵan "aýyz sý" baǵdarlamasyn memleket bekitti. Buqara bórikterin aspanǵa laqtyrdy qýanǵannan. Alaıda, osy aptada, elimizdiń qarjy polısıasy, aýylsharýashylyq mınıstrliginiń sý resýrstary komıtetiniń laýazymdy tulǵalaryn qazyna qarjysyn qaltalaryna saldy dep aıyp taǵyp, qylmystyq is te qozǵady. Jaǵalylardyń, jeti oblysta ornalasqan otyz alty sý sharýashylyǵyn tekserýge bólingen bir jarym mıllıard teńgeni sýǵa aǵyzǵany anyqtaldy. MURAT JUMANBAI, QR EKONOMIKALYQ QYLMYS JÁNE SYBAILAS JEMQORLYQQA QARSY KÚRES AGENTTİGİNİŃ RESMI ÓKİLİ: -Respýblıkanyń jeti oblysynda ornalasqan 36 sý sharýashylyǵynyń júıelerimen, gıdrotehnıkalyq qurylǵylardy tekserýge "Aýyz sý " baǵdarlamasy boıynsha bólingen 1.5 mlrd teńge urlaý faktisi boıynsha aýylsharýashylyq mınıstrliginiń sý resýrstary komıtetiniń laýazymdy tulǵalary men ózge tulǵalarǵa qylmystyq is qozǵaldy. LIMARA SALIH, TİLSHİ: Jeti myńnan astam eldi-mekendi sýmen qamtamasyz etýge tıis bolǵan "Aýyz sý" baǵdarlamasy qarqyndy bastalǵanymen, búdjet qarajatyn jymqyrǵan shendilerdiń kesirinen aıaqtalmaı jatyp jabylǵan-dy. Al, dál osy atqaminerler, Qazaqstandaǵy sý júıesiniń jetpis paıyzy isten shyqqan, segiz jarym myń shaqyrym sý qubyry jedel túrde jóndeýdi qajet etetinin jınalystarda birneshe márte jalpaq jurtqa jarıa etken. Qalaı bolǵanda da, bir tamshy sýǵa zar bolǵan buqaranyń kúıin túsiný qaltalylarǵa qıyn.

31 arna jańalyqtary