Qamaýda jatqan shekarashynyń atasy Vladımır Chelah pen anasy Svetlana Vashenko senbi, maýsymnyń 9-y kúni Almaty oblysy Úsharal qalasyndaǵy tergeý ızolátoryndaǵy Vladıslavpen kezdesken edi. Al jeksenbi kúngi baspasóz maslıhatyna tek atasy qatysty. Onyń aıtýynsha, kishkentaı balasy syrqattanyp qalǵandyqtan Svetlana Vashenko Qaraǵandyǵa shuǵyl túrde qaıtyp ketken.

JAŃA BOLJAM

Baspasóz maslıhatynda Vladımır Chelah Úsharal qalasynda aıtqan sózderin jýrnalıser burmalady dep sanaıtynyn jetkizdi. Nemeresimen kezdesýge 5-aq mınýt berilgenin jáne kezdesý kezinde Vladıslav Chelahtyń múldem sóılemeı, meńireý qalypta turǵanyn aıtty. «Nemerem «qylmysty men jasaǵan joqpyn» dep aıtty» degen keshegi málimdemesin múldem joqqa shyǵardy. - Bizdi eki jarym saǵat kúttirip qoıdy. Tergeý ótip jatyr degen sekildi syltaýlar aıtty. Sodan keıin tergeý ızolátoryna alyp baryp, maǵan da, anasyna da tek 5 mınýttan berdi. Ol jerde bizden basqa ızolátor qyzmetkerleri, advokat, taǵy basqa kóp adam boldy. Vladıslav maǵan eshnárse aıta almady. Ol ózin jaısyz sezindi, ábden qorqyp qalǵan. Ol úndemeı ǵana meniń aıtqanymdy tyńdap turdy. Men oǵan: «Vladık, ulym, seniń jazyqsyz ekenińdi biletin adamdar bar. Eger seni bireýler qorqytsa, qoryqpa» dep birneshe ret qaıtaladym. Aqyr aıaǵynda qoshtasar sátte betinen súıip edim, kózinen birdeńe baıqadym, menińshe ol meni túsingen sıaqty, - dedi Vladımır Chelah.

​​ Chelahtyń pikirinshe, nemeresin belgisiz bireýler psıhotropty zatpen ýaqytsha esinen adastyrǵan. Sodan keıin ózderiniń aram oılaryn júzege asyrǵan.

- Ony qystaqtan, tósektiń astynan taýyp alǵan. Tósektiń shetinde tapansha ilinip turǵan jáne bir shólmek araq bolǵan. Qudaı atymen ant etemin, nemerem araq ishpeıdi, - dedi Vladımır Chelah. Onyń sózinshe, 19 jastaǵy balanyń 14 adamdy jaıratyp salǵandyǵyna, qaza bolǵan shekarashylardyń da ata-analary senbeıdi eken. - Olar maǵan kún ara telefon soǵyp otyr. Tipti bir áıel úıimizge de keldi. «Meni asyp tastasa da, bul qylmysty jasaǵan men sizdiń ul ekendigine senbeımin» dedi. Ata-analar qazir menen bir habar kútip otyr. Baryp, kórgen-bilgenińdi aıt dep otyr. Olar kerek bolsa meni qoldaýǵa daıyn, - dedi Vladımır Chelah. Tiri qalǵan shekarashynyń atasy prezıdent Nursultan Nazarbaevtyń shekarada terakt jasalýy múmkin degen áýelgi boljamyna silteme jasap, Úsharal otrádyna qarasty zastava postylarynda buryn da tótenshe oqıǵalar bolǵan, bul da sonyń biri degen mazmundy sóz aıtty. Ol «Arqankergen» postynyń qasynan «kópshilikke belgili» esirtki saýda joly ótedi dep sanaıdy. Vladımır Chelah nemeresine tergeý kezinde qysym jasalyp jatqan joq dep birneshe ret qaıtalady jáne memlekettik advokattyń taǵaıyndalýyna qarsy emes ekenin bildirdi. SHEKARASHYLARDY JERLEÝ "Qazaqparat" agenttiginiń habarlaýynsha, 10 maýsym kúni Qazaqstannyń birneshe oblysynda qaza bolǵan shekarashylardy resmı túrde jerleý rásimderi uıymdastyryldy. Marqum Erlan Aqyshev (1988 jyly týǵan) pen Talǵat Sársembaevtardy (1988 j.t.) jerleý rásimderi Úsharal aýdanynda ótti. Jeksenbi kúni Qaraǵandy obylsynyń Balqash qalasynda shekarashy Nurlanbek Muqashevti (1991 j.t.) týystary men jaqyndary aqtyq saparǵa shyǵaryp saldy. "Qazaqparat" onyń otbasyna 1.4 mıllıon teńge járdemaqy tólendi dep habarlady. Taraz qalasy men Shý aýdanynda qaza bolǵan jambyldyq eki shekarashy Nurjan Úsipálıev (1991 j.t.) pen Janat İlıasovty (1992 j.t.) jerleý rásimderi uıymdastyryldy. Atyraý qalasynda marqum úsh shekarashy Danıar Balǵabaev (1992 j.t.), Jeńis Saǵynǵalıev (1990 j.t.) jáne Bekzat Ámirǵalıevterdi (1989 j.t.) sońǵy saparǵa shyǵaryp salý jıyny ótti.

​​ Al Batys Qazaqstan oblysynyń Tasqala aýdany Mereı aýylynda «Arqankergen» postynyń bastyǵy, kapıtan Altynbek Kereevti (1984 j.t.) jerleý rásimi ótti.

"Qazaqparattyń" habarlaýynsha, opat bolǵan shekarashylar Rústem Aqylbaev,  Denıs Reı jáne Meıirhan Imenovtiń múrdeleri áli tanylǵan joq. 30 mamyr kúni Almaty oblysy Alakól aýdanyndaǵy «Shyǵys» aımaqtyq shekara qyzmeti Úsharal otrádynyń "Sarybókter" zastavasyna qarasty "Arqankergen" postynda 14 shekarashy men bir qoryqshy óli kúıinde tabylǵan edi. Bas prokýratýra ókili birneshe kúnnen soń tabylǵan tiri qalǵan jalǵyz shekarashy Vladıslav Chelah áskerı qyzmettesterin "ózi óltirgenin moıyndady" dep habarlaǵan. Chelahtyń týystary bul aıyptaýǵa sene almaıtyndaryn málimdegen bolatyn. "Azattyq radıosynyń" saıtynan. Áýelgi taqyryby: Chelahtyń atasy "Arqankergenniń" qasynan esirtki tasymaldaý joly ótedi deıdi