Ánel Árinova – tabysty áıel, ánshi ári aıaýly ana. Jalǵyz uly jýyrda eki jasqa tolady. Osy ýaqyt ishinde ánshi jańa álemniń esigin ashyp, bala tárbıesinde túrli ádis ashqan.Bul týraly ánshi Comod.kz basylymyna bergen suhbatynda aıtyp berdi, -  dep habarlaıdy Qamshy.kz  Stan.kz - ke silteme jasap.

1) Kóp adam sábıdiń ata-anasynyń qylyqtaryn qaıtalaıtynyn eskermeıdi. Sondyqtan otbasynda, oshaq qasynda ózińizdi qalaı ustaıtynyńyz óte mańyzdy. Barlyǵyna nazar aýdaryńyz! Búldirshin kórgen-bilgenderin arnaıy dıskige jazyp otyrady. Sondyqtan kez-kelgen ata-ana bala tárbıesine kirispes buryn ózin jaqsylap tárbıeleýi tıis.

2) Balapanymdy erkeletkendi qatty jaqsy kóremin. Únemi "ulym meniń", "táttim sol" syndy sózderdi jıi aıtamyn.

3) Ár kúnimizdi aldyn ala josparlaımyz. Imranǵa kúni boıy ne isteıtinimizdi aıtyp otyramyn. "Balapanym, biz qazir túski as ishemiz. Sosyn birge oınaımyz degen syndy. Osylaısha Imran aldyda ózin ne kútip turǵanyn shamamen boljaı alady.

4) Balańyz qansha jasta bolsa da, sanaly jan ekenin umytpaǵaısyz. Oǵan óziniń árdaıym syı-qurmetke laıyq ekenin kórsetińiz. Ár suraǵyna asqan yjdahattylyqpen jaýap berińiz. Birnárse aıtsa, erinbeı tyńdańyz. Áıtpese, eseıgen shaǵynda ol sizge qamqorlyq tanytpaıtyn bolady.

5) Men kez-kelgen ata-ananyń jumys isteıtinin, úıge sharshap keletinin jaqsy túsinemin. Dese de, balanyń kózinshe eshýaqytta uryspańyzdar. Sabyrsyzdyǵyńyz ben ashýshańdyǵyńyzdy basa bilińiz. Keıde úı sharýasymen ǵana aınalysqym keletin sátter bolady. Alaıda muny kishkene batyrǵa túsindire alamyn ba? Sondyqtan ne istep jatsam da, ol shaqyrǵan kezde kirim men ydysymdy jýyp bitpesem de qasyna baramyn.Men úshin Imran men onyń qalaýy óte mańyzdy. Onyń janynda ózim de balasha máz bolyp, birge sýret salamyn, qaryndashtar laqtyryp, eńbektep júremiz, bir-birimizdi qýalap, oıynshyq kóliktermen oınaımyz. Keıde ózi qolyma kitap ustatyp, ony oqyp berýimdi suraıdy. Eger oqıǵa oǵan unamasa, ony sońyna deıin tyńdatyp qınamaımyn. Qyzyq bolar degen jańa birnárse usynamyn.

6) Balasy tilin almaǵan kezde áke-shesheleriniń "Sen osyny jasamasań, men seni jaqsy kórmeı qoıamyn" degen sózderin jıi estip jatamyn. Menińshe, bul úlken qatelik. Kerisinshe Imranym qandaı jaǵdaı bolsa da, oǵan qoldaý kórsetip, ony jaqsy kóretinimdi aıtqym keledi.

7) Balamnyń ózin-ózi joǵary baǵalaýy men úshin óte mańyzdy. Ádette bala jurttyń ózi týraly pikirlerinen quralady. Qazir tili shyqpasa da, bolashaqta jadynda qalǵan jaqsy estelikterdi aıtyp beredi degen úmittemin. Biz árdaıym oǵan óziniń qandaı symbatty, meıirimdi, aqyldy ekenin jıi aıtyp otyramyz.

8) Ómirden alǵan tájirıbe. Bizdiń synypta tórttik baǵa alsa jylap otyryp alatyn bala bolatyn. Munymen qatar, balalalarynyń ózgelerden erekshe ekenin jıi aıtyp otyratyn ata-analar boldy. Alaıda mundaı tárbıe alǵan balalar jarystan jeńilis tapsa, saǵy synyp, beti qaıtyp qalady. Men eshýaqytta balama "Sen bárinen de jaqsysyń" dep aıtqan emespin. Bar bolǵany ár adamnyń ózindik erekshelikteri bar ekenin túsindirip beremin. Men úshin onyń árbir jasaǵan isinen lázzat alǵany mańyzdy.

9) Bir kezderi áleýmettik jelide "Balańyzǵa daýys kóteresiz be? Imrandy buzyqtyqtary úshin jazalaısyz ba?” degen suraqtar jıi qoıylatyn edi. Balany ursyp, uıaldyrýdyń esh qajeti joq dep oılaımyn. Bul aqyrynda jaqsylyqqa alyp kelmeıdi. Oǵan qarapaıym tilmen "Edenge sýret salýǵa bolmaıdy, al qaǵazǵa bolady. Teledıdardy jaqynnan qarasań, kóziń aýyratyn bolady" degendeı túsindirip otyrý qajet.

10) Balam óziniń pikiri mańyzdy ekenin sezinse deımin. Sondyqtan tamaq bolsyn, kıim bolsyn oǵan árdaıym tańdaý quqyǵyn beremin. Mysaly, tańǵy nemese túski asqa barǵan kezde mindetti túrde "Ulym botqa jeısiń be álde irimshik jeısiń be?" dep suraımyn. Jáne munyń árqaısysyn onyń aldyna qoıyp qoıamyn.

Tili shyqpaǵandyqtan ázirge tek qolymen nusqaıdy. Bir jerge jınalyp jatqan kezde de osylaı jasaımyn. "Shorty kısiń be, álde shalbar kıesiń be?" dep suraımyn. Birde ol men usynǵan bas kıimderden bas tartyp, shkafty ózi ashyp, ishinen beısbolkasyn tańdap alǵan bolatyn. Qýanyshymda shek bolmady! Buıryqqa qaraǵanda osy ádister utymdyraq.

11) Keıde Imrannyń maǵan múldem nazar aýdarmaıtynyn baıqaımyn. Sondaı sátterde ony qoltyǵyma qysyp alyp, úıge qaraı alyp ketemin.