Ońtústik Qazaqstan oblysy boıynsha aýyl sharýashylyǵy daqyldarynyń egis kólemi ótken jyldan 12,8 myń gektarǵa artyp, 788,6 myń ga alqapqa jetti. Bıyl oblys dıhandary astyq ósirýde ozyq tehnologıalardy, onyń ishinde tereń qopsytý ádisin qoldana otyryp, úlken kórsetkishterge qol jetkizdi.  

Máselen, dıqandar 214,4 myń ga jerge masaqty dándi daqyldar egip, onyń ár gektarynan 22 sentnerden (2015 j -17,8 s/ga), barlyǵy 470 myń tonna ónim jınaǵan. Bul ótken jylǵymen salystyrǵanda 123 myń tonnaǵa artyq, dep habarlaıdy oblys ákimdiginiń baspasóz qyzmeti. 

Aıta keteıik, bıyl sharýalar jalpy dándi daqyldardan 660 myń tonna ónim jınaýdy josparlap otyr.  

Sonymen qatar, oblysta búgingi kúnge deıin 866 myń tonna kókónis, 991 myń tonna baqsha ónimi, 181 myń tonna kartop jınaldy. Agrarly aımaqtyń turǵyndary jalpy bıyl 125 myń tonna jemis-jıdek jáne 73 myń tonna júzim  jınaýdy kózdep otyr. Búginge kúnge deıin olar 47,6 myń tonna jemis, 23,2 myń tonna júzim jınaǵan.

Jıyn-terim jumystarymen qatar, mal azyǵyn daıyndaý jumystary qarqyndy júrgizilýde. Sharýalar ázirge josparlaǵan 3 484,4 myń tonnanyń 3747 myń tonnasyn (108%) daıyndap úlgergen.