Transvıstıtti ulttyq arna efırine shaqyryp basy daýǵa qalǵan Láılá Sultanqyzy ózine qarata aıtylǵan synı pikirlerge jaýap berip, kórermenderinen kómek surady, - dep habarlaıdy Qamshy.kz NUR.KZ-ke silteme jasap.
Az ýaqyt buryn "Qazaqstan" arnasynyń "Áıel baqyty" baǵdarlamasynyń kezekti sanynda jynys aýystyrý máselesin sóz etilgen bolatyn. Qonaq retinde baǵdarlamaǵa transseksýal shaqyrylyp, ol óziniń oqıǵasyn baıandap bergen.
Baǵdarlamanyń bul sanyn kórgen kórermen áleýmettik jelide, BAQ betterinde joba avtorlaryna, telearna basshylyǵyna qarata synı pikirlerdi boratty. Tipti, Láılá Sultanqyzyna qatysty kóptegen jaǵymsyz pikirler aıtqan, jýrnalısi jumystan qýýdy talap etkender de boldy. Olardyń aıtýynsha, bul baǵdarlamany jasaý arqyly "Láılá Sultanqyzy Ulttyq arnanyń qasyqtap jıǵan abyroıyn shelektep tókken".
A. Soldatbaı esimdi jýrnalıs "Qazaqstan" AQ Basqarma tóraǵasy Nurjan Jalaýqyzynan arna "abyroıyn tókken" Láılá Sultanqyzyn jumystan shyǵarýdy talap etip, hat jazǵan bolatyn.
Bul hatpen tanysqan Láılá Sultanqyzy jelide jaýap jazyp, kórermenderinen aqyl surady.
"Myna bir shyqqan maqala avtoryna ne qosar edińiz? Ardabek Soldatbaı esimdi tilshi óz oıyn osylaı bildirgen eken. Osy kezge deıin Úshbýda qoǵamda bolyp jatqan ne bir hattardy oqyǵan edik. Endi sol keı hat ıelerin efırge shaqyryp, jurtqa kórsete bastaǵan edik... Ótken efır sany jynysyn aýystyrǵan transvestıtti kórsetken. Saıttarda osyndaı maqalalar qaptap ketipti. Álde biz aıtpaı, kórsetpeı, kózdi jumyp qoıyp júre berýimiz kerek pe edi? Sonymen, Ulttyq arna Láılá Sultanqyzyn jumystan shyǵarsyn ba? Siz ne oılaısyz, qurmetti oqyrman?!", - dep suraıdy Láıli Sultanqyzy oqyrmandarynan.
Láılá Sultanqyzyna oqyrmandary túrli pikirlerin jaýdyrdy. Jeli qoldanýshylar arasynda ony jaqtaǵandar da, dattaǵandar da tabyldy.
"Qazirgi qoǵamnyń ózekti problemasy ǵoı bul. Onda turǵan ne bar? Sol úshin jumystan shyǵarý kerek pe? Tań qalyp otyrmyn, jumystan shyǵarý kerek degenge", "Bastyqtardy maqtap tizip otyrǵyzyp qoıyp, jınalys jasaı bergenshe eldiń arasyndaǵy kem ketiktı aıtqanda ne tur", "Qoǵamnyń aýrýy bul, al aýrýyn jasyrǵan óledi", - dep jazdy qoldanýshylardyń deni.
Transseksýal jigitti ekranǵa shyǵarǵany úshin Láılá hanymǵa syn aıtyp, jýrnalısiń "sóziniń jany bar" ekenin aıtqandar da tabyldy.
