Búgin Astana qalasynda turatyn Kádimqyzy Orynbasar úshin aq túıeniń qarny jarylǵan kún boldy, - dep habarlaıdy Qamshy.kz Muslim.kz-ke silteme jasap.

Qala shetindegi jaldap turyp jatqan qýyqtaı bólmesine QMDB-nyń tóraǵasy, Bas múftı Erjan qajy Malǵajyuly keledi dep keıýana múldem oılamasa kerek. Ara-tura hal-jaǵdaıyn surap, kómektesip ketip turatyn «Áziret Sultan» meshitiniń qyzmetkerlerimen birge jańbyrly kúni úıine kirip kelgen dinbasyn kórgeninde, tipten, abdyrap qaldy. Kózinde jalt ete qalǵan qýanysh ushqynymen birge, tańdanys taby da joq emes.

Alaıda, qýanyshtyń kókesi áli alda edi. Qart ájeıge qurmetin kórsetip, qonaq bolyp kelip qalǵan Bas múftıdiń qarıaǵa arnaǵan tosynsyıy taǵy bar eken. Aldymyzda kele jatqan 1-qazan «Qarttar kúnine» oraı Kádimqyzy Orynbasar apamyzdy merekemen quttyqtap ótken Bas múftı «Qajylyq sertıfıkatyn» tabystaǵan sátte apamyz shydamastan eki kózine erik berdi.

Osydan birneshe aı buryn otandyq telearnalardyń birinde baǵdarlama qonaǵy bolǵan apamyz óziniń asyl armany – qajylyq sapary jaıly aıtyp, turmys taýqymeti turalatqan myna zamanda sol armanym oryndalmaı ketetin shyǵar dep kúrsingen edi. Oılamaǵan jerden oljaly bolyp, kóńili sharyqtaǵan qart ájeı kelgen qonaqtarǵa aq tilegin jaýdyryp, kóńilin bosatty.

Budan bólek, Orynbasar ájeıge «Áziret Sultan» meshiti atynan 100 000 teńge kóleminde qarjylaı kómek pen azyq-túlik qory tartý etildi.