Birneshe jyl buryn jeti jylǵa sottalǵan eks-mınıstr  búginde operasıalyq ústel janyna qaıta oraldy. Bul týraly Jaqsylyq Dosqalıev «Halyq sózine» bergen suhbatynda aıtyp berdi.

Memleket basshysynyń aralasýymen bosatylǵan dáriger kún saıyn adam ómirine arasha túsip, óziniń súıikti isimen aınalysýda.

Qazir Jaqsylyq Dosqalıev ózin bostandyqqa shyǵarýǵa yqpal etken elbasyna ishteı rahmetin aıtyp júredi eken.

«Bálkim men «ana jaqta» jatsam, osy kúnge deıin ólip keter me edim. Qazir kún-túni elbasyna alǵys aıtamyn, ishteı. Meniń ótinishimdi qaraýǵa ýaqyt taýyp, úlken júrekpen keldi. Tek qana men emes, besiktegi balamyzdan bastap búkil týǵan-týystarym, jaqyndarym, bárimiz qazir sol kisiniń tileýin tileımiz», - deıdi óz sózinde dáriger.

Sóz arasynda Jaqsylyq Dosqalıev operasıany segiz saýsaǵymen jasaıtynyn aıtyp qaldy. Esterińizde bolsa, ol «qyzmet babyn asyra paıdalandy» degen kúdikpen qylmystyq is boıynsha tergeý kezinde ınsýlt alǵan edi.

«Men qazir ekinshi toptaǵy múgedekpin. Biraq múgedekpin dep ózimdi aıap otyra almaımyn. Árıne, áriptesterime alǵys aıtamyn. Meniń aıaqqa turyp ketýime kúsh-qajyrlaryn aıamady. Qazir eki saýsaǵym nasharlaý, biraq segiz saýsaqtyń ózi operasıaǵa jetip jatyr. Sol aıaǵymdy syltyp basamyn. Sprınterlik júgirýge barmaımyn. Biraq kúnbe-kún áriptesterimdi úıretýge, nan taýyp jeýge densaýlyǵym jetedi», - deıdi dáriger hırýrg.

Eks-mınıstr joǵary laýazymda otyrǵan ýaqytta áriptes bolǵan atqaminer azamattarmen áli kúnge aralasyp turatynyn jetkizdi.

«Barlyǵymen aralasyp turamyn, depýtattarmen de, úkimet múshelerimen de, barlyǵymen. Men olarmen nege aralaspaýym kerek? Bireýdiń ákesin, bireýdiń sheshesin óltirgen joqpyn. Men eshteńe urlaǵan joqpyn. Ózimdi qylmyskermin dep sanamaımyn. Óıtkeni men ony jasaǵan joqpyn», - dedi eks-mınıstr.

Sondaı-aq, eks-sheneýnik, eshkimge ókpelemeıtinin málimdedi.

Ol burynǵy laýazymdy qyzmetinen eshqandaı rahat kórmegenin jetkizdi.

«Bylaıǵy halyq mınıstr bolǵan rahat dep oılaıtyn shyǵar. Eshqandaı da rahatyn kórmedim. Ashyǵyn aıtqanda, mınıstrdiń qyzmetinde júıke tozdyrýdan basqa eshteńe joq. Óıtken, mınıstr bolsań, bárine sen kinálisiń, aıdaladaǵy medbıke naýqasty qabaq shytyp qarsy alsa, taıaq saǵan tıedi. Kúnde taıaqtyń astynda bolǵan ońaı emes», - deıdi Jaqsylyq Dosqalıev.

Dáriger myrzanyń balalary elde abyroımen qyzmet jasap jatyr eken.

«Ulym – neırohırýrg, Japonıada bes jyl oqyp kelip, Neırohırýrgıa ortalyǵynda jumys istep jatyr. Qyzym – notarıýs. Tórt nemerem bar», - dep shúkirshilik etedi Jaqsylyq Dosqalıev.

Dáriger-hırýrg Qazaqstandaǵy transplantasıa máselesine toqtaldy. Onyń aıtýynsha, elimizde maman tapshy emes, dárigerler jetkilikti. Transplantasıa jasaýǵa tek donor tapshylyǵy seziledi.