Jánibek, Kereı keshe «Qazaqtasa»,
Bolǵan joq bir jolata azap, tasa.
Erleri qaıtip qana shydar deısiń?
Duspandar araǵa sap azaptasa!..
Jerine salsa kelip bekinisin,
Toltyrsa qan josaǵyp besik ishin...
Sulýyn irgesinen súırep shyǵyp,
Qazaqtyń qalyńdatty ókinishin.
Jaılaýyn, jaıylymyn, ózen-kólin,
Tartyp ap buıyrtpaǵan óz eńbegin.
Qol salsa qoıynyńa kórpeńdi ashyp,
Basynǵan qorlyǵyna tózer me ediń?!
Sol kezde atqa qondy Alash arly,
Óıtkeni júregine jara saldy.
Qolyna týyn alyp turan jurty,
Jolyna qurban etip bala, shaldy...
Órt etti jaý tabany tıgen jerdi,
Dinsizdiń nájisine ılendi eli.
Uran sap qazaq jurty «Alash!»-dedi,
Ot qarý, qan-qanjardan ımenbedi.
Alashtyń ar bar edi tamyrynda,
Tektilik ashytqysy qamyrynda.
Uıyǵan Imany bar júreginde,
Bolsa da qazaq kúpi qabyǵynda!
Oqyǵan top bastady kósemderim,
Ketpesin jatqa dedi keseńdegiń!
Kózine shuqyp turyp kórsetti olar,
Júrgenin qylysh súırep osy elde kim.
Keskenmen ker zamanda basymdy myń,
«Alashym» tunshyqqanmen ǵasyr buryn.
Ult rýhy óshkeni joq, sóngeni joq,
Báriniń tamyzdyǵy asyl dinim!
Igergen san ǵylymdy azyq etip,
Imandy tereń qaqqan qazyq etip.
Eldikti quraıyq dep atqa mingen,
Shaǵynda ketpeı turyp jazym ótip!..
Qamalyp tar qapasta batyr ótti er...
Túledi, qaıta týyp qasiretti El.
Sham jaqqan sanasyna Alashymnyń,
Álıhan, Mirjaqyp pen Ahymetter!..
«Men ósken oıpań jerge alasa aǵash,
Demeımin jemisi mol tamasha aǵash.
Qalǵansha jarty jańqam men sendikpin,
Ala ber qajetińe jarasa, Alash!».
Degen jan umytylmas sanamyzdan,
Erligi artyq bolǵan san ańyzdan.
Otarshyl ımperıa bozdaqtardy,
Baýyzdap baıtaq jerde qan aǵyzǵan.
Endeshe shyqpaq emes jadymyzdan,
Dalamyz arshylýda qary-muzdan.
Biz degen alsyndaǵan órkendermiz,
Týralmaı tiri qalǵan Jadyńyzdan.
Tarıhym sabaq bolsyn búgingige,
Qaraımyz ımandyǵa, bilimdige.
Osynaý derbestigim baıandy bop,
Úskirik shalmasa eken búrimdi de!..
Armany oryndaldy ǵasyr attap,
Baq keldi, táýelsizdik astyma Taq.
Týym kók, tuǵyrym jer, Astanam nur,
Jarqyra «Alash» rýhy asyl, áppaq!
