Shyǵys Qazaqstan oblysynda apatqa ushyraǵan jolaýshylar tikushaǵy Semeı qalasynyń burynǵy ákimi Qaırat Turlyhanovtyń áıeli - Ǵafýra Turlyhanovaǵa tıesili bolǵan, - dep habarlaıdy QR IDM Azamattyq avıasıa komıtetiniń ókilderi.
2009 jyldyń 27 tamyzynda qurastyrylǵan "Strekoza 7-Gazelle SA341" tikushaǵynyń zaýyttan shyqqan nómiri - EEVS.02.0325. Bort nómiri - UP-LA246, ushý salmaǵy: 1800. 2016 jyldyń 22 jeltoqsanynda tikushaq 1087 nómirimen Qazaqstanda tirkeldi. Ushý jaramdylyǵynyń merzimsiz sertıfıkaty 2016 jyldyń 23 jeltoqsanynda berildi. Jalpy maqsatta paıdalanýǵa ruqsat etilgen.
Tikushaq Turlyhanova Ǵafýra Muhatbekqyzyna tıesili. Ol Semeıdiń ákimi, QR Qaýipsizdik keńesi hatshysynyń jáne QR Kólik jáne komýnıkasıa mınıstriniń keńesshisi, osy mınıstrliktiń kólik baqylaý komıtetiniń tóraǵasy bolǵan. Ashyq aqparat kózderinde sońǵy jumys orny retinde "Vokzal-Servıs" AQ prezıdenti dep kórsetilgen.
Eske salaıyq, jeke menshiktegi S-341 tikushaǵy keshe Úrjar aýdanyndaǵy Qoja aýylynan ushyp shyǵyp, Aıagóz aýdanyndaǵy Aqshataý aýylyna qonýy kerek bolǵan. Kýágerler tikushaqtyń Aıǵyzdyń ústinen ushqanyn kórgen. Alaıda jeter jerine jetpegen. 25 aqpanda saǵat 18.30-da pılot baılanysqa shyqpaǵan. İzdeý sharalary barysynda tikushaq Aıagóz qalasynan soltústik-batysqa qaraı 60 shaqyrym jerden tabylǵan. Ony izdeýge oblys ortalyǵynan bortynda qutqarýshylar toby jáne SHQO TJD basshysynyń orynbasary bar MI-8, Semeı qalasynan MI-17 áskerı tikushaǵy ushyp shyqty. SHQO TJD daǵdarys ortalyǵynda jáne Aıagóz aýdanynda jedel shtab quryldy. İzdestirý jumystaryna SHQO TJD jeke quramynan jáne aýdandyq İİB 29 adam men 4 tehnıka jumyldyryldy. Jerigilikti atqarý organynan 10 adam jáne 5 tehnıka shyqty.
