1. Qos báıterek

Ahmet Baıtursyuly men

Mirjaqyp Dýlat rýhyna.

Avtor.

Ahań, Jaqań — birin-biri tolyqtyrǵan tulǵalar,

Ekeýiniń janyn jegen kózderinde muń da bar…

Ult jolynda qajymastan eńbek etken ekeýi,

Ekeýi de lapyldaǵan janyp turǵan ot edi.  

Jol bastaǵan Alashynyń Serkeleri bolatyn,

Qaı jaǵdaıda ultpen ósip, ultpen birge tolatyn.

Ahań ultyn uıqydaǵy "Masa" bolyp shaǵatyn,

Jaqań bolsa, "Oıan, qazaq!" dep birinshi shabatyn.

Eki tulǵa shyn máninde – Tireýi edi ultynyń,

Al jaýlary ekeýine daıarlaǵan myltyǵyn.

Ahań bolsa, Qazaǵynyń Álippesin jasady,

Jaqań bolsa, aq júregin óz ultyna ashady. 

Ushan-teńiz bolatyn-dy ekeýiniń bilimi,

Qaı zamanda qadyr tutqan Uly ǵana — Ulyny!  

Ekeýi de — óz ultynyń Azattyǵyn kórmedi,

Eshqashan da qoldarynan ult namysyn bermedi.

Arman etti uly oılaryn barsha Túrik halqynyń,

Týy boldy ekeýi de ulttyq ǵuryp-saltynyń.

Kók Túriktiń sarbazdaryn ekeýi de úlgi etti,

Ult jolynda bul pánıden ekeýi de birge ótti.  

Qaıda bolsa qutylmaǵan jendetterdiń torynan,

Eki bozdaq óltirildi qyzyldardyń qolynan.

Olar óldi, biraq ulty aman jetti búginge,

Uıqtap jatyr eki bozdaq qos báıterek túbinde…

Bizdiń qazaq bilip aıtqan: "Tekti,-deıdi, - Tektini!",

Ult qolynda jelbireıdi Kók Túriktiń kók týy!!!

2. Ant

Saltymdy saqtaımyn,

Antymdy satpaımyn,

Ózimdi saqtaımyn,

Halqymdy saqtaımyn!

Ultymdy saqtaımyn,

Túrkimdi saqtaımyn,

Qandaı bir daýyldan

Jurtymdy saqtaımyn.

Ult úshin muzdaımyn,

Ult úshin syzdaımyn,

Kelse de ne zaýal

Sertimdi buzbaımyn.

Maqsatqa jetemin

Jalǵyzbyn, jekemin…

Qansha ómir qalsa da

Berik bop ótemin.

Túri osy jaıymnyń,

Burqansam – daýylmyn.

Ult úshin kez kelgen

Kúreske daıynmyn.

Men shyndap Ant berem,

Demeımin jalt berem,

Kún keshem ólgenshe

Qazaqı saltpenen.

Adalmyn — ózime,

Adalmyn — sózime,

Senbeseń qarashy,

Ot shashqan kózime?!

Ótirik aıtpaımyn,

Men tynysh jatpaımyn,

Osy alǵan betimnen

Ólsem de qaıtpaımyn.

Aldymen — adammyn,

Jaqsymyn, jamanmyn,

Sóz berdim, bergen soń

Antyma adalmyn!!!

3. Alashtyń Ardager Uldary

Janymdy qoıatyn jyrlatyp,

Kúıimde ulttyq áýen bar.

Álıhan, Ahmet, Mirjaqyp,

Mustafa, Maǵjan, Halel bar…

Ulty úshin kúresken tulǵalar,

Solarmen men shyndap maqtanam!

Ultymen qashan da birge olar,

Qaıda da men olar jaq bolam.

Qapastan qarmanyp jol tapqan

Al olar — ultymnyń Serkesi.

Dinime, tilime shorqaqtar —

Ultymnyń búgingi derti osy!..

Muraty — ulty úshin birge ólý,

Ózime úlgi etem olardy.

Ulty úshin kúresti úırený

Solardan bastalǵan jol aldy.  

Qazaqtyń Ary men Namysy

Shoq juldyz – alashtyq Erlerim!

Qazaqtyń birtýar arysy

Solardaı Erlerdi kórmedim! 

Adassam — jol tappaı tumanda

Solarǵa túzeımin betimdi.

Solardaı qasqaıyp turam da

Kesse de jaýlarym etimdi.

Olarǵa berilgen tutastaı

Sertimnen eshqashan taımaımyn!

Olarmen mine, men , qandaımyn,

Gúl bolyp shattanyp, jaınaımyn!

Júre alam eshkimnen tyǵylmaı

Sózimde tıtteı de jalǵan joq!

Alashtyń Ardager ulyndaı

Ultymdy súıe alsam — arman joq!

Solarǵa eliktep ótemin

Az ǵana ǵumyrym jetkenshe.

Tańdaǵan óz jolym — tóte bul

Jek kórsin jaýlarym, jek kórse!..

Solardaı men de ulmyn Alashqa

Ultyma, tegime adalmyn.

Uqsaımyn men emen aǵashqa

Shaıqaltpas daýyly zamannyń.

Qoldaǵy týymsyń jyǵyltpas

Sendersiń, ultymnyń muń-zary.

Senderdi bul ultyń umytpas

Alashtyń Ardager Uldary!!!