Almaty oblysy Eńbekshiqazaq aýdanynyń turǵyny pnevmatıkalyq qarýmen baqshasyna kirip ketken tórt jastaǵy balany aıaǵynan atyp qulatqan. Birneshe bala kórshiniń qorshaýsyz aýlasynda oınap júrgen, dep habarlaıdy NUR.KZ
Bul týraly portal tilshisine jábirlenýshiniń anasy aıtyp berdi. Bes balany jalǵyz ózi tárbıelep otyrǵan Maıra İbiljannyń sózinshe, bul jaǵdaı boıynsha qozǵalǵan qylmystyq isti aýdandyq ishki ister bólimi kóp uzamaı jaýyp úlgergen. Alaıda zańgerdiń aralasýymen prokýratýraǵa hat jazyp, ony qaıta qaratýǵa múmkindik aldy. Sonda da jalǵyzbasty ananyń qorqynyshy seıiler emes. Qylmystyq isti aýdandyq ishki ister bólimindegi týra sol maman qaıta qaraýyna alǵan. Maıra İbiljan oblystyq ishki ister departamentin osy isti qadaǵalaýdy ótinip otyr.
Tórt jastaǵy Ábdikerimov Aqjoldyń aıaǵyna oq atqan 40 jastaǵy kórshisi bolyp shyqty.
Qazir búldirshin aıaǵyn syltyp basady. Anasynyń aıtýynsha Aqjol súrinip qulaı beretin bolǵan. Fotodan kórinip turǵandaı, portal redaksıasyna jetem degenshe ol qulap, ústin taǵy bylǵap aldy.
«7 qyrkúıek kúni jumystan kelsem, balamnyń ústi sý, jylap otyr eken. Balam buzyqtyq jasap qoıdy eken dep oıladym. Odan sál úlkenirek birinshi synyp oqıtyn qyzymnan surasam, kórshi balalar oınaıtyn jaqta atty dedi. Bular bala emes pe, kórishimizdiń baqshasyna kirip ketipti. Onysy durystap qorshalmaǵan da. Aıaǵy qan josa. Balamdy jýyndyryp, jańaǵy úıdiń úlkenderine bardym. Apasy shyqty. Men ol kisige: «Kishkentaı balaǵa oınaýǵa sondaı atylatyn myltyq bere me?», - urystym. Kórshi, onyń ústine kishkentaı bala ǵoı dep odan árige barmadym», - deıdi Maıra.
Úıge kelgende kishkentaı Aqjol mazasy qashyp, jylaı beredi. Esi shyqqan anasynyń oıyna ulynyń aıaǵynda oqtyń bar-joǵy kirip shyqpapty. Kósheden bir tanys jigitti shaqyryp alyp, Aqjoldy aýyldyq feldsherdiń úıine aparǵan.
«Aýyldyq medbıke ulymnyń aıaǵyn kórip, oq tıgen jerde birdeńe bolýy múmkin ekenin aıtyp, basqa úlken aýyldyń aýrýhanasyna barýǵa keńes berdi. Qaıtyp kele jatqanda jańaǵy ulymdy kóterisip aparǵan jigit aıaǵynan kim atqanyn surady. Sonda ǵana oǵan oq atqan bala emes, eresek adam ekenin bildik. «Bizdiń esiktiń aldynan ótetin qyzyl mashınadaǵy aǵa» degen sózdi estigennen keıingi meniń túrimdi elestetip kórińizshi», - deıdi kelinshek.
Aqjol Ábdikerimov sol kúni balabaqshada bolýy kerek edi. Alaıda bir sebeptermen barmaı, úıde qalǵan. Ol birinshi synyp oqıtyn ápkesi, kórshiniń eki balasymen aýlada qýalaspaq oınap júrip, bireýdiń qorshaýsyz aýlasyna kirip ketken.
Maıra İbiljan oq atqan kórshisiniń balasyn adam túgili ıt qurly kórmeı basynyp otyrǵanyn aıtady. Ol tipti qansyrap turǵan balany aýrýhanaǵa aparýǵa jaramaǵan.
Aýyldyq aýrýhanada aıaǵyna tıgen oqty taba almaǵan dárigerler, balany aýdandyq aýrýhanaǵa jiberedi. Ol jerde hırýrg bolmaı, Ótegen batyr aýylyndaǵy balalar aýrýhanasyna kelgen. Aqjoldyń aıaǵyna kirgen oq birneshe santımetrge tómen túsip ketken eken. Dárigerler oqty hırýrgıalyq jolmen alǵan. Úıde qalǵan balalaryn oılaǵan kelinshek aýrýhanaǵa jatýdan eriksiz bas tartypty.
Osy jaıt qylmystyq istiń jabylyp qalýyna muryndyq bolyp otyr dep esepteıdi jalǵyzbasty ana.
Óz kezeginde zańger Asylhan Otashev bul oqıǵa boıynsha qozǵalǵan qylmystyq istiń zańsyz jabylǵandyǵy jóninde prokýratýraǵa shaǵym túsirip, ony qaıta kóterýge múmkindik aldy.
Tórt jasar Aqjoldyń aıaǵynan atqan azamatqa qatysty isti medısınalyq saraptamaǵa silteme jasaı otyryp japqan. Alaıda zańger saraptamanyń qylmystyq is jabylyp, 23 kún ótken soń taǵaıyndalǵanyn, jáne balanyń medısınalyq kartasyna ǵana negizdelip jasalǵanyn anyqtady.
«İs qaıta qaralyp jatyr. Bul kisiniń basty qorqynyshy - isti qaıta jaýyp tastamaı ma degen kúdik. Munda kelý sebebi de - qylmystyq isti júrgizýdi oblystyq ishki ister departamenti baqylaýyna alsa degen oı. Eńbekshiqazaq aýdanynda qyz zorlaıdy - isti jaýyp tastaıdy, jol-kólik oqıǵasy bolady - isti jaýyp tastaıdy. Osyndaı jaǵdaı oryn almasa eken dep tileımiz», - deıdi zańger.
