QR Investısıalar men damý mınıstri Jeńis Qasymbek Qazaqstan-Qytaı elderi arasyndaǵy qarym-qatynas jaıly Facebook áleýmettik jelisindegi jeke paraqshasynda jazady.

"Qytaıǵa jasaǵan jumys saparymda QHR Kólik mınıstri Lı Sáopenmen kezdesip, nátıjeli dıalog qurdyq. Búgingi tańda eki el arasyndaǵy yntymaqtastyq jan-jaqty strategıalyq áriptestikke aınaldy. Bıyl ındýstrıa, kólik salalary boıynsha birlesken jańa kásiporyndardy iske qosý josparlanyp otyr jáne ekonomıkanyń túrli salalaryn qamtıtyn jańa jobalardyń qurylysy bastalady. Biz tranzıttik-kólik salasyndaǵy Eýrazıalyq áleýetti meılinshe júzege asyrýǵa múddelimiz. Sarapshylardyń baǵalaýynsha, 2020 jylǵa qaraı aımaqtaǵy saýda kólemi 1,2 trln. dollarǵa jetedi. Al, Qytaı men Eýropalyq odaq arasyndaǵy taýar aınalym 800 mlrd. dollardy quraıtyn bolady, júk tasymalynyń kólemi 170 mln. tonnaǵa deıin artady. Biz úshin Qytaıdan Ortalyq Azıa elderine, Reseı, Eýropa, sonymen qatar, Iran men Taıaý Shyǵys elderine konteınerlik tasymaldy arttyrý ózekti másele bolyp tur. Qytaı-Qazaqstan-Eýropa baǵyty boıynsha konteınerlik júk tasymaldaý utymdy jol. Qytaı-Eýropa baǵyty boıynsha 2016 jyly qańtar-qarasha aılary aralyǵynda 725 poıyzben 62 816 konteıner tasymaldandy. Al, Eýropa-Qytaı baǵyty boıynsha 30 187 konteıner tasymaldanǵan. Poıyzdardyń ortasha jyldamdyǵy táýligine 950 shaqyrymdy quraıdy. Sondaı-aq, biz kórshi elmen avıasıa salasyndaǵy yntymaqtastyqty nyǵaıtýdy josparlap otyrmyz. Bıyl Almaty-Beıjiń áýereısi aptasyna 5-ten 7-ge deıin, al, Astanadan Beıjińge aptasyna 2-den 4-ke deıin artatyn bolady. Astana-Úrimshi jáne Almaty-Úrimshi baǵyttaryna qosymsha reıster shyǵatyn bolady", - deıdi Jeńis Qasymbek.