Qazaqstan men Reseı Prezıdentteri kezdesý barysynda ekijaqty yntymaqtastyq máselelerin jáne kún tártibindegi basty halyqaralyq taqyryptardy talqylady. Bul týraly Aqordanyń baspasóz qyzmeti habarlady.

Memleket basshysy Qazaqstannyń Reseımen qarym-qatynasynyń ereksheligine toqtalyp, eki el arasyndaǵy senim men túsinistik deńgeıi joǵary ekenin atap ótti.

– Bıyl aramyzda dıplomatıalyq qarym-qatynastyń ornaǵanyna 25 jyl tolady. Tyǵyz yntymaqtastyq arqasynda biz Eýrazıalyq ekonomıkalyq odaqty qurdyq. Bul onyń barlyq qatysýshylary úshin mańyzdy ári perspektıvaly qurylym dep sanaımyn. Búginde Reseıdiń 7 myńnan astam kásiporny Qazaqstanda ókildikterin ashyp, jańadan qaıta óńdeý ónerkásibin qurýǵa yqpal etýde. Sizdiń byltyr kúzde Qazaqstanǵa jasaǵan saparyńyz ben Eýrazıalyq ekonomıkalyq odaq aıasynda Sankt-Peterbýrgtegi kezdesýimiz quny 3 mıllıard AQSH dollaryn quraıtyn 41 kelisimshartqa qol qoıýǵa múmkindik berdi, – dedi Qazaqstan Prezıdenti.

Nursultan Nazarbaev kún tártibindegi halyqaralyq máselelerge qatysty Qazaqstan men Reseıdiń ustanymy birdeı ekenin jáne BUU Qaýipsizdik keńesi aıasynda ortaq mindetterdi iske asyrý úshin eki el de bar kúsh-jigerin jumsaıtynyn aıtty.

– Reseı halyqaralyq ózekti máselelerdi sheshý, sonyń ishinde Sırıa qaqtyǵysyn retteý jóninde sharalar qabyldaýda. Astanada birneshe kelissóz ótkizý týraly usynys bildirgen de Reseı bolatyn. Úderis bastalyp ketti. Jalpy osy jáne basqa da máselelerdi sheshý úshin jyl boıy birqatar kezdesý ótkizý qajet, sonyń biri 8 maýsymda Astanada ótetin Shanhaı yntymaqtastyq uıymy aıasyndaǵy basqosý bolmaq. Qazirgi barlyq máseleler dostyq negizinde sheshilýde. Birlesken kásiporyndar quryp, alǵa qaraı ilgerileıtin bolamyz, – dep túıindedi Memleket basshysy.

V.Pýtın Nursultan Nazarbaevqa Sırıadaǵy qaqtyǵysty retteý jónindegi kelissózderdi Astanada uıymdastyrǵany úshin alǵys bildirdi.

– Bul úderiste Qazaqstan tarapynyń jaı uıymdastyrýshy retinde ǵana qatysyp qoımaı, jalpy jaǵymdy ról atqarǵanyn bilemin. Siz kezdesý uıymdastyrýǵa tikeleı atsalysyp, qatysýshylarmen jáne delegattarmen jumys júrgizdińiz. Sizdiń arqańyzda eshqashan bolmaǵan nátıjege qol jetkizdik. Ásirese, atystyń toqtatylýyna baqylaý jasaý tetigi tabyldy, bul – eń basty másele. Endi bul Jenevada jalǵasatyn kelissózderge negiz bolady, – dedi Reseı Prezıdenti.

V.Pýtın Qazaqstannyń Reseıdiń basty ekonomıkalyq seriktesiniń biri retindegi mańyzdylyǵyn atap ótip, ıntegrasıalyq úderister barysynda jasalǵan jaǵdaı arqyly naqty kólemdi ulǵaıtýǵa qol jetkizip, yntymaqtastyqty udaıy arttyryp otyrý qajettigin aıtty.

Reseı Prezıdenti óz eliniń jahandyq máselelerdi sheshýde Qazaqstannyń BUU Qaýipsizdik keńesiniń turaqty emes múshesi retindegi qoldaýynan úmitti ekenin jetkizdi.

Kezdesý sońynda taraptar Eýrazıalyq ıntegrasıa aspektilerin jáne ekonomıka salasyndaǵy ózara is-qımyl perspektıvalaryn talqylady.