Búgingi reportajdyń keıipkeri sýper-model, tabysty kásipker, ıakı sahna juldyzy emes. Ol bar bolǵany Shymkent qalasyndaǵy komýnaldyq qyzmet kórsetýshilerdiń biri - Nusqalıeva Leıla Joltaıqyzy. 1969 jyly dúnıege kelgen azamatshanyń joldasy ómirden qaıtqan. Jalǵyz qyzy bar dep jazady szh.kz.

Tańerteń dalaǵa shyqqanyńyzda aýlanyń sypyrylyp, taza turatynyn Siz de baıqaıtyn shyǵarsyz? Túnde kórgen qoqystar da joq. Kóshege shyqqanyńyzsha qalany aınadaı etken kim? Kúni-túni qardan, qoqystan tazartyp, gúl men taldy sýaryp júretin jandar týraly ne bilesiz? Olardyń jumysyn jeńildetip, ıakı aýyrlatýǵa at salysyp júrgenderdiń biri emessiz be? 

Tańǵy saǵat 4.00-de ol ózine tańǵy asy men tústigin daıarlaıdy. Jeksenbi kúni demalys. Eger dalada qar jaýsa, demalysqa qaramastan jumysqa shyǵady.

“Jyly kıimderdi bizge jumystan beredi. Biraq qansha qymtanyp, oranyp alsaq ta, sýyq”, – deıdi Leıla.

Avtobýs parkine jetý úshin ol kún saıyn 1 km jol júredi. Arnaıy kólik saǵat 5.30-da ony basqa qyzmettesterimen birge aýdannyń ár aımaǵyna jetkizedi.

“Alǵashynda osy jumystan uıalyp, “tanystarym kórip qalmasyn” dep jasyrynyp júretinmin. Keıinnen “eńbek etip, adal nan taýyp júrmin ǵoı” dep bekindim”, – deıdi Leıla.

Ol ár kún saıyn 5 000 sharshy metr jerdi tazalaıdy. “Jumys aýyr. Biraq jeńiline barsań, nan joq”, – deıdi aýla sypyrýshy.

Leıla osy qyzmette 10 jyldan beri jumys istep keledi.

Onyń aılyq tabysy – 54 myń teńge. “Turmysyma negizi jetkilikti aqsha. Biraq qyzym stýdent bolǵan soń, keıde qıyndyqtar týyp jatady”, – deıdi ol.

“Nebir adamdardy kezdestirýge bolady. Keıbir jas balalar kómektesip jatady, al keıbireýleri ádeıi qoqys tastaıtyndaı kórinedi. Sonda da ómirde meıirimdi, jaqsy adamdar kóp”, – dep atap ótti ol.

“Túski asty ózimizben birge ala kelemiz. Biraq qysta ol báribir sýyp qalady ǵoı. Kúndelikti arnaıy býdkada tamaqtanamyz. Keıde bolady, turǵyn úılerdiń jórtólesinede (podval) tústenemiz”, – dep qymsynyp jymıdy Leıla.

“Kóbiniń basynda nesıesi bar. Keıbiri – otbasynnyń jalǵyz asyraýshysy. Biraq mundaı máseleler bizdiń jadyrap júrýimizge tosyq bolmaıdy. Bir-birimizdi kúlip qarsy alamyz”, – deıdi Leıla.

“Keıbir kólik ıeleri mashınalaryn dál adam júretin, biz tazalaý kerek jerlerge qoıyp qoıady. Bul bizdiń jumysymyzǵa qatty kedergi keltiredi”, – deıdi ol.

“Men óz mamandyǵymmen maqtanamyn. Qalany tazartyp, nátıjesin kórgende, kózim qýanady. Qala taza bolsa, adamdardyń da kóńili jaı”, – deıdi Leıla.