1 naýryz – Alǵys  aıtý  kúni, 8 naýryz –  Halyqaralyq  áıelder  kúni qarsańynda Qazaqstan Teatrlary asosıasıasynyń  uıymdastyrýymen  5 naýryzda  Qazaqstannyń  halyq  artısi, «Qurmet» belgisi, «Parasat» ordenderiniń  ıegeri, 100  jastaǵy   Aısha  Abdýllınanyń  ómiri  men shyǵarmashylyǵyna   arnalǵan  «Ǵasyr  kýágeri Aısha anamyzǵa  myń alǵys!»  atty  mereıtoılyq  kesh ótedi. 

Ótetin orny: M.Áýezov  atyndaǵy  Qazaq Memlekettik  akademıalyq  drama  teatry (Úlken zal)

Ótý ýaqyty: 5 naýryz, 2017 jyl.

Bastalýy: 18.30. 

Teatr  óneriniń   damýy  men  bolashaǵyn  órkendetý, teatr qaıratkerlerine  qoldaý  tanytý  ıdeıasy negizinde   2016 jyly  qurylǵan Qazaqstan teatrlary asosıasıasy (QTA) jalpy teatrlarǵa ortaq   anyqtalǵan  negizgi  baǵyttardy  júzege asyrý maqsatyn ustanady. Qazaqstan  teatrlary  asosıasıasynyń  alǵashqy  jobalarynyń  biri – 1 naýryz – Alǵys aıtý kúni men 8 naýryz – Halyqaralyq  áıelder meıramy qarsańynda  kórnekti  sahnager, Qazaqstannyń halyq  artısi, «Parasat» «Qurmet» ordeniniń ıegeri, 100 jastaǵy Aısha Abdýllınanyń ómiri men shyǵarmashylyǵyna  arnalǵan  mereıtoılyq  kesh uıymdastyrý  bolyp  otyr. 

 A.Abdýllına óner jolyn  1933 jyly M.Áýezov atyndaǵy qazaq drama  teatrynda  bastaǵan. 1947 jyldan  bastap  alpys bes jylǵa jýyq ómirin J.Shanın atyndaǵy  Ońtústik  Qazaqstan  drama  teatrynyń sahnasynda  ótkerdi. «Qyz Jibekte» Qyz Jibek, «Qozy Kórpesh- Baıan sulýda»  Baıan, «Qobylandyda»  Qurtqa,  «Er Tarǵynda» Aqjúnis,   «Asaýǵa-tusaýda» Katarına, «Otelloda» Dezdemona, «Romeo-Djýlettada» ledı Kapýlettı, «Eki myrzaǵa bir qyzmetshide» Beatrıche t.b. kórkem rolderimen kórermen kózaıymyna aınaldy. 200-den asa súbeli beıne jasaǵan aktrısa  14 ret Keńes Odaǵy medaldarymen marapattaldy,  1958 jyly Qazaq KSR halyq artısi qurmetti ataǵyn aldy.

A.Abdýlına, teatr ónerimen qatar  qoǵamdyq jumystarǵa da belsene atsalysty.  Ońtústik Qazaqstan oblystyq keńesine jáne eki márte  Shymkent qalalyq keńesine depýtattyqqa saılanyp, Elbasymyz  N.Á.Nazarbaevtyń eki márte «Alǵys  hatymen» marapattalyp, 1996  jyly  Prezıdent  stıpendıasynyń  ıegeri atandy.

           Teatr ónerine ólsheýsiz  eńbegi sińgen, el mádenıeti úshin  adal qyzmet etken 100 jastaǵy  Aısha anamyzdyń ónegeli óneri men parasatty ómir joly óskeleń   urpaqqa  úlgi-ónege  ekeni aqıqat.

           Ult maqtanyshynyń ulaǵatty ómirin nasıhattaý  «Aısha Abdýllına 100 jasta»  atty  mereıtoılyq  keshti uıymdastyrý  Qazaqstan  Teatrlary  asosıasıasynyń  Quryltaı sezinde  bekitilgen  Jarǵy  negizindegi  basty mindetterdiń  bir  tarmaǵy  bolyp  tabylady.