AQSH-ta qazaqstandyq dáriger Nurbol Danıarov osydan birer kún buryn iz-tússiz joǵalyp ketken. Bul týraly «Qamshy» portaly ktk.kz-ke cilteme jasaı otyryp habarlaıdy.
Almatylyq gınekolog dáriger óziniń mamandyǵyn kásibı túrǵyda jetildirý baǵdarlamasy boıynsha shetelge barǵan. Alaıda, elge qaıtyp oralýǵa bir kún qalǵanda ol iz-tússiz joǵalyp ketken. Áleýmettik jelilerde Nurboldyń joǵalǵany týraly aqparat 7 naýryz kúni jarıalanyp, taraı bastady. Qazaqstandyq dárigerdi izdestirýge tek otandastary ǵana emes, sheteldik azamattar men amerıkandyq polıseı qyzmetkerleri de at salysqan. Alaıda, kóp uzamaı joǵalǵan Nurbol Danıarov óziniń aman-saý ekendigin habarlaǵan. Belgili bolǵandaı, ol basqa elde óziniń demalysyn jalǵastyrmaq bolǵan. Qazaqstandyq dárgerlerdiń biliktiligin kóterý máselesin uıymdastyrýshy Nurgúl Salıeva Danıarovtyń elge oralýǵa 1 kún qalǵanda joǵalyp ketkenin rastady:
«Tańerteń Nurboldy tańǵy asqa shaqyrǵanda, ol tómenge túspeı qoıdy. Ota jasaýymyz kerek bolǵan. Sondyqtan qatty asyǵys edik. Nurboldyń bólmesine kirgende onyń joq ekenin bildik. Polısıa qyzmetkerlerin shaqyrtqanda, olar Nurboldyń kıimderin qarap, izdep kórińder dedi. Biz izdegende, shynymen de onyń kıim-keshekteri joq bolyp shyqty».
25 aqpanda osynda kelgen 3 dáriger ózderiniń kásibı biliktilikterin jetildirý maqsatynda amerıkandyq hırýrgtardan sheberlik saǵatyn alyp, ota jasaýdy úırenip júrgen. Alaıda sheberlik saǵatynyń sońǵy kúninde qatysýshylardyń biri Danıarov qashyp ketken.
Uıymdastyrýshylardyń aıtýy boıynsha, Danıarov aldyn-ala Rıchmond-CHıkago reısine bıletin shyǵaryp alypty. Demek, óziniń bul saparyn aldyn-ala oılastyryp, josparlaǵan.
Áleýmettik jelilerde osy oqıǵaǵa qatysty biraz daý-damaı, shý shyqqan. Bireýler Danıarovty qoldasa, ekinshileri ony jazaǵa tartýdy usynǵan.
Al osyndaı shýdyń shyǵýyna negizgi sebepshi bolǵan Nurbol Danıarov óziniń isinde turǵan uıatty da, qylmysty da eshteńe joq dep otyr:
«Men eshqaıda qashqan joqpyn. Uıymdastyrýshylarǵa kelgen kúni-aq qarajattaryn tólep tastadym. Eshkimge eshteńe mindetti emespin. Olar meni elimniń aldynda jeksuryn etip kórsetip otyr. Olardyń maǵan, meniń jeke tulǵama degen qarym-qatynasy unaǵan joq. Áýeli bylaı bolady dep túsindirgen, keıin kelgen soń múlde basqasha sóıledi. Men olardy da, elimdi de aldaǵam joq» -deıdi N.Danıarov. Onyń aıtýynsha ol bıletti óz aqshasyna satyp alǵan. Sonymen birge, jaqyn arada týǵan eline qaıtatyndyǵyn, qazir eńbek demalysynda júrgenin jetkizdi.
Alaıda, osy jaǵdaıdan keıin uıymdasyrýshylarda AQSH-ta qazaqstandyq mamandardyń biliktiligin jetildirý baǵdarlamasyn jaýyp tastaı ma degen qorqynysh týyp otyr.
