Búgin Astanadaǵy baspasóz máslıxatynda Qytaı Halyq Respýblıkasynyń Qazaqstandaǵy Tótenshe jáne Ókiletti Elshisi Chjan Hanxýeı qazaqstandyq ánshi Dımash Qudaıbergenniń Qytaıdyń mádenı naryǵyndaǵy tańǵajaıyp jetistigine qatysty óz pikirin bildirdi, dep xabarlaıdy QazAqparat
"Dımash tańǵajaıyp jetistikke jetti. Ol Qytaıdyń jarqyn juldyzyna aınaldy. Árıne, qazaqstandyqtar úshin bul - óte úlken bonýs. Ózim sizderdi shyn júrekten quttyqtaımyn! Negizi, qazirgi baıqaýdy kórsetip jatqan "Hýnan" arnasy keńinen tanymal. Onyń efırinen san alýan baǵdarlamalar kórsetiledi. Alaıda sheteldiń azamattary kóp túse bermeıdi. Dımash bolsa, birden jarq etip, jastardyń kózine tústi, solardyń kózaıymyna aınaldy. Ásirese, jas jetkinshekter ony qatty súıedi, qatty emes, qulaı súıedi deýge bolady. Onyń daýysyna ǵana emes, minezine de tánti boldy. Dımashtyń boıynan qazaq xalqynyń mádenıeti, Uly Dalanyń minezi barynsha baıqalady. Mine, dál osy qasıet qytaılyq kórermenderdiń qyzyǵýshylyǵyn arttyryp otyr. Qytaıda Dımash óte tanymal, barlyq kórermender derlik ony biledi. Sondyqtan ol óziniń kásibin Qytaıda damyta alady dep oılaımyn. Ol - bir. Ekinshiden, ol Qytaıdyń mádenı naryǵynda Qazaqstannyń tanystyrylymyn óte jaqsy jasady. Endi, qazaqstandyqtarǵa Qytaıdyń mádenı naryǵyna jol ashyq", - dep atap kórsetti elshi.
Aıta keteıik, búgingi baspasóz máslıxatynda Chjan Hanxýeı Qytaıdyń qazirgi áleýmettik-ekonomıkalyq jaǵdaıy týraly aıtyp berdi. Onyń sózine qaraǵanda, Qytaıda jyl saıyn 13,1 mln. jańa jumys oryny ashylyp turady. Odan bólek, elshi Astanadaǵy EKSPO kezinde qytaılyqtarǵa jatyn oryndardyń jetetinine kúdiktenip otyr. Sondaı-aq Chjan Hanxýeı "qytaılyq qater" týraly mıfti joqqa shyǵarýǵa tyrysty.
