QR Prezıdenti Nursultan Nazarbaevtyń tapsyrmasy boıynsha Qazaqstan Premer-Mınıstri Baqytjan Saǵyntaev Aqtóbe oblysyna keldi. dep habarlaıdy qamshy.kz

B. Saǵyntaevtyń jumys baǵdarlamasynda óndiristi tehnologıalyq jańǵyrtý jáne sıfrlandyrý máseleleri boıynsha ónerkásiptik kásiporyndardyń ujymdarymen, sondaı-aq nátıjeli jumyspen qamtý jáne jappaı kásipkerlik Memlekettik baǵdarlamasynyń júzege asyrylý máseleleri boıynsha oblys jurtshylyǵymen kezdesýleri josparlanǵan. 

Sonymen qatar memlekettik-jekeshelik áriptestik aıasynda salynǵan iri ınfraqurylymdyq, bilim berý jáne medısına nysandaryn aralaıdy dep josparlanǵan. Sondaı-aq Premer-Mınıstr «Nurly jer» baǵdarlamasy aıasynda turǵyn úı nysandarynyń qurylys barysymen tanysady. 

Aıta keteıik, Aqtóbe oblysynyń Qazaqstan úshin mańyzdy áleýmettik-ekonomıkalyq mańyzy zor, óıtkeni QR Prezıdentiniń tapsyrmasyna sáıkes munda aýqymdy aglomerasıa damyp, zamanaýı ýrbanıstik ortalyq qurylady. Sonymen birge, oblysta birqatar iri ónerkásiptik jáne ınfraqurylymdyq kásiporyndar ornalasqan.

Eske sala keteıik, QR Premer-Mınıstri Qazaqstan óńirlerine jumys saparyn jalǵastyrýda. Josparlanǵan kestedegi birinshi oblys Shyǵys Qazaqstan oblysy boldy. Búgin Baqytjan Saǵyntaev Batys Qazaqstan oblysynda boldy, endigi Aqtóbe oblysyna keldi.

Baqytjan Saǵyntaevty Aqtóbe oblysyndaǵy ozyq agrotehnologıalarmen tanystyrdy

QR Premer-Mınıstri Baqytjan Saǵyntaev Aqtóbe oblysyna jumys sapary barysynda óńirdegi asa iri jylyjaı keshenderiniń birinde boldy.

Nysandy aralaý kezinde QR Premer-Mınıstri gaz-týrbınaly stansa jumysymen, kókónisterdi ósirýdiń golandıalyq tehnologıalary qoldanylatyn jylyjaı ǵımaratymen tanysty, sondaı-aq aýyl sharýashylyǵy tehnıkasy men jabdyqtar kórmesi Premer nazaryna usynyldy.

Golandıalyq tehnologıa boıynsha salynǵan «Grın Haýs Qazaqstan» kesheni óz jumysyn «QazAgroQarjy» AQ qoldaýymen Indýstrıaldy-ınnovasıalyq damý memlekettik baǵdarlamasy aıasynda júzege asyrady. Jobanyń júzege asyrylýy óz óndirisi esebinen oblystyń jas kókónisterge degen qajettiligin tolyǵymen qamtamasyz etýge, sondaı-aq artyq ónimdi eksportqa jiberýge múmkindik beredi.

Premer-Mınıstrge eksportty ulǵaıtý jóninde júrgizilip jatqan jumystar týraly, sonymen qatar Memleket basshysynyń tapsyrmalarynyń oryndalýy, atap aıtqanda, aýyl sharýashylyǵy ónimderin óńdeý deńgeıin arttyrý, sýarylatyn jerlerdi qalpyna keltirý, aýyl sharýashylyǵy kooperatıvterin qurý, sondaı-aq aýyl sharýashylyǵy salasynda ǵylymnyń damýy týraly baıandaldy.

Aıta ketý kerek, AÓK-tiń damýy elimizdiń jaqyn bolashaqtaǵy basymdyqty baǵyttarynyń biri retinde aıqyndalǵan. Osy oraıda 2017 jyldan bastap Úkimet 2017-2021 jyldarǵa arnalǵan AÓK-ti damytýdyń jańa Memlekettik baǵdarlamasyn júzege asyrýdy bastady, onyń basty maqsaty jınalatyn ónimdi arttyrý jáne sala kásiporyndarynyń qaıta óńdeý, júktelý úlesin kóterý bolyp tabylady.