Búgin Astana ýaqyty boıynsha saǵat 08:22-de «KazSat-2» ǵarysh apparaty jumysynda shtattan tys jaǵdaıy anyqtaldy dep habarlaıdy inform.kz. Osynyń saldarynan «OTAU TV» jerseriktik telehabar taratý jelisindegi analogtyq efır jelisi men «Qazaqstannyń» oblystyq arnalarynyń taratqysh jelisinde teleradıobaǵdarlamalar taratýda kedergiler týyndady.
«Qazteleradıo» AQ tarapynan teleradıobaǵdarlamalar qabyldaýdy «KazSat-3» jerseriginen analogtyq taratý jelisine aýystyrý boıynsha jedel jumystar júrgizilip jatyr. Qazirgi ýaqytta oblystyq mańyzy bar qalalar men aýdan ortalyqtarynyń kóbinde teleradıoarnalardyń analogtyq taralýy tolyǵymen qalpyna keltirildi. Qalǵan aýdan ortalyqtarynda habar taratýdy qalpyna keltirý jumystary birneshe saǵattyń ishinde aıaqtalady.
«Qazaqstannyń» oblystyq arnalarynyń aýdan ortalyqtary men aýyldyq okrýg deńgeıinde analogtyq efır jelisinde, sonymen qatar "OTAU TV" jerseriktik telehabar taratý jelisi arqyly taralýy «Kazsat-2» jerserigi jumysy qalpyna kelgeninen keıin júzege asyrylady.
«KazSat-2» jerserigi jumysyn qalpyna keltirý sharalaryn «Respýblıkalyq ǵarysh baılanysy ortalyǵy» atqarýda.
