Bir jyldan asa ýaqyt jasaǵan úlken jumystardyń nátıjesinde, QR Bas prokýratýrasyna, SHQO prokýratýrasyna, Aýyl sharýashylyq mınıstrligine, taǵy birneshe memlekettik organdarǵa jazylǵan ondaǵan hattardan keıin memlekettik organdar tarapynan tekserýler júrgizilip, ótken jyly SHQO Úrjar aýdanyndaǵy «Bátýa», «Yrǵyn», «Mánfaǵat» JSHS 91 432,5 gektar jerge zańsyz jer paıdalaný quqyǵyna berilgeni anyqtalǵan bolatyn.
QR Aýylsharýashylyq mınıstrliginiń Jer resýrstaryn basqarý komıteti arnaıy tekserý júrgizip, komıtettiń tekserý qorytyndysy týraly 2016 jyldyń 22 shildesindegi № 42-16-29-1/1 aktisine sáıkes Shyǵys Qazaqstan oblysy Úrjar aýdanynyń ákimshiligi tarapynan «Bátýa» «Yrǵyn», «Mánfaǵat» JSHS 91432,5 gektar jerdi zańsyz jalǵa bergenin anyqtaǵan.
Sonyń nátıjesinde ASHM Jer resýrstaryn basqarý komıteti atalǵan seriktestikterge jer berý týraly SHQO Úrjar aýdanynyń jer berý jónindegi qaýlylarynyń kúshin joıý týraly sotqa aryz berip, nátıjesinde, 23 qarasha 2016 jyly SHQO arnaıy mamandandyrylǵan ekonomıkalyq sotynyń sheshimimen «Bátýa» JSHS jer paıdalaný quqyǵyndaǵy 84 182 gektar aýylsharýashylyq jeri memleketke qaıtarylǵan bolatyn.
Odan keıin biz, QR Aýylsharýashylyq mınıstrligine qalǵan 7 250 gektar jerdiń ne úshin qaıtarylmaı qalǵany týraly taǵy hattar jazyp, ASHM Jer resýrstaryn basqarý komıtetimen birlese jumys jasaǵan edik.
ASHM Jer resýrstaryn basqarý komıtetiniń talap aryzynyń nátıjesinde SHQO arnaıy mamandandyrylǵan ekonomıkalyq sotynyń 03 shilde 2017 jylǵy №2-2143-17 sheshimimen qytaı kompanıasynyń úlesi bar «Bátýa» JSHS jer paıdalaný quqyǵyna berilgen 7 244,7 gektar jáne jeke menshikke satylyp ketken 5,3 gektar jerdi memleketke qaıtaryldy.
Osy istiń basy qasynda bolyp, birge at salysqan «Alash joly» qozǵalysynyń múshelerine, QR Bas prokýratýrasyna, SHQO prokýratýrasyna, Aýyl sharýashylyq mınıstrligine jáne mınıstrliktiń Jer resýrstaryn basqarý komıtetine rızashylyǵymyzdy bildiremiz.
Jumys odan ári jalǵasýda...
Qurmetpen, Maqsat İlıasuly jáne Aıdyn Egeýbaev
