Atyraý oblystyq aýrýhanasynyń №1 nevrologıa bóliminiń pasıentteri áńgimelegen hıkaıa qatygezdigimen tań qaldyrady. Bul bólimshege Qaraqalpaqstannyń týmasy, 26 jastaǵy Parýaz Mnajatdınova 28 maýsymda túsken. Aıaýsyz soqqyǵa jyǵylǵan ony polıseıler Avangard yqshamaýdanynan taýyp alǵan. Jedel járdemdi de solar shaqyrǵan, dep habarlaıdy Qamshy aqparattyq agenttigi Aq Jaıyq basylymyna silteme jasap.
Jas áıel aýrýhanaǵa aýyr kúıde jetkizildi. Bala kezden qoıanshyq aýrýymen aýyrady eken, al aıaýsyz soqqydan keıin onyń jaǵdaıy nasharlap ketti. Qoıanshyq ustamasy birinen keıin biri qaıtalana berdi. Pasıent óz-ózine kelgen kezde palatalas kórshilerine basynan keshken jaǵdaıdy áńgimelep berdi. Parýazdyń dármensizdigin kórgen olar «AJ»-ǵa kómek surap júgindi.
Sonymen, ótken aptada men birneshe ret jolyqqan Parýazdyń aıtýynsha, ol Nókisten Aqtaýǵa kúıeýine barady. Poıyzda úsh qyzben tanysqan. Olardyń bári nıqab kıip alǵan, sondyqtan bet-júzderin kórmegen. Olardyń biriniń ózin Jumagúlmin dep tanystyrǵany esinde.
- Olar maǵan Atyraýǵa úılerine bara jatqanyn aıtyp, poıyzdan túsip, ózderimen birge ketýge kóndire bastady, - dep áńgimeledi Parýaz. – Bala kútýshi jumysyn usynyp, kún saıyn 2800 teńgeden tólep turýǵa ýáde berdi. Bul óte jaqsy aqsha. Men týystaryma kómekteskim keldi, sondyqtan kelistim. 21 maýsymda Atyraýǵa keldik. Vokzalda bizdi aq jıppen er adam kútip aldy. Meni eki qabatty kotejge aparyp, tólqujatym, týystarymnyń nómirleri bar telefonym salynǵan sómkemdi alyp qoıyp, jertólege qamap tastady. Bala kútýshi jumysynyń ornyna meni áldebir kafede jumys jasaýǵa májbúrledi. Sosyn shaǵyn meshitke aparady, ol jerde de tamaq daıyndaýǵa tıis boldym. Túnderimdi egeýquıryqtar jaılaǵan jertólede ótkizdim, olar aıaǵymdy tistep alatyn. Ol jerde birneshe kún ótkizgen soń, meni aldap soqqandaryn túsindim. Sátin taýyp, qashyp ketýdi uıǵardym. Alaıda ol adamdar ustap alyp, uryp-soǵa bastady. Basymnan uryp, shashymnan súıredi. Sosyn da ustamam ustaǵan shyǵar. Men segizinshi synyptan beri qoıanshyq aýrýymen aýyramyn. Olar qorqyp ketip, meni kóshege laqtyryp tastady. Óz-ózime kelgen kezde, basym aýǵan jaqqa qaraı júgire berdim...
Bul hıkaıanyń qanshalyqty shynaıy ekenin bilmeımin. Alaıda fakt bar: bireýler aıaýsyz soqqyǵa jyqqan áıel qujattarsyz aýrýhana kereýetinen bir shyqty.
Palatalas kórshilerdiń aıtýynsha, Parýazǵa polıseıler kelgen:
- Olar onymen áńgimelesti. Biraq ol aryz jazǵan joq. Polıseıler aryz jazýdy usynǵan joq, al ol tipti bul týraly oılamady da. Onyń ústine, qazaq tilin de, orys tilin de bilmesten, ustamasy birneshe saǵat saıyn qaıtalap otyrǵan kúıde qalaı jazsyn.
Parýazben men alǵash 5 shildede kezdestim. Osy kúnnen bastap atyraýlyq polıseılerden komentarı alýǵa árekettenip kelem, biraq túk shyqpady. Olarǵa qoıar suraǵym kóp: osy fakt boıynsha qylmystyq is qozǵaldy ma? Zardap shegýshiniń týystaryn izdeý sharalary alynyp jatyr ma? Parýaz Mnajatdınovany otanyna jiberý úshin qujattardy resimdeý máseleleri sheshilip jatyr ma?
Al demalys kúnderi buǵan beı-jaı qaramaǵan qala turǵyndary tabyldy. Olar Parýazǵa kıim-keshek pen dám, baılanysty bolý úshin uıaly telefon ákelip berdi. Ózderine tanys Ózbekstan azamattaryna Dosnazarov sovhozynda turatyn jáne Atyraý qalasynda aýyr jaǵdaıda qalǵan 26 jastaǵy Qaraqalpaqstan týmasy týraly siltemeler taratty. Parýazdyń hıkaıasy lezde kópshilikke tarap ketti. Týystarynyń baılanys derekteri ekinshi kún degende tabyldy. Parýazdyń ákesimen habarlasyp, qyzynyń basynan ótken jaǵdaıdy baıandady. Ókinishke oraı, bul qart qyzynyń artynan barýǵa kúshi de, materıaldyq múmkindigi de joq ekenin aıtty.
Búgin, 10 shildede tańerteń Parýaz bizben habarlasyp, dárigerlerdiń ony aýrýhanadan shyǵarýǵa daıyndap jatqanyn aıtty. Shyqqan kezde baratyn jeri de joq...
Biz Parýazdyń basyndaǵy jaǵdaı ol úshin jaqsy jaǵyna sheshilip, beıtanys adamdarǵa senbeý kerektigine úıretip, sabaq bolady dep úmittenemiz. Biraq bul hıkaıada eki nárse tań qaldyrady – qarapaıym jáne oǵan múldem beıtanys adamdardyń janashyrlyǵy jáne azamattardy qorǵaý qyzmettik mindetterine kiretinderdiń múldem áreketsizdigi. Biz atyraýlyq polıseıler shet qalmaı, ózderine qatysty sharalar alady degen úmitimizdi joǵaltpaımyz.
