Bıylǵy jyly 9 qyrkúıekte Astana qalasynda Halyqaralyq EKSPO kórmesi aıasynda sharshy alańǵa shyǵatyn  qazaqstandyq boksshylardyń tizimi anyqtaldy, dep habarlaıdy qamshy.kz aqparattyq agenttigi.

Boks keshiniń basty jekpe-jeginde orta salmaqtaǵy WBO NABO jáne WBA Inter-Continental tujyrymdary boıynsha álem chempıony Qanat «QAZAQ» Islam (24-0, 19 KO) óz belbeýlerin jeńilip kórmegen kanadalyq Brendon Kýkqa qarsy qorǵaıdy.

Bul kúngi boks keshinde taǵy segiz qazaqstandyq boksshylar rıngte óner kórsetedi. Olar alys jáne jaqyn sheteldik boksshylarmen judyryqtasady.

Olardyń tizimi tómendegideı:

1. Qanat Islam - kásipqoı boksta áli jeńilmegen qazaqstandyq boksshy. Osy ýaqytqa deıin otandasymyz kásipqoı boks alańynda 24 kezdesý ótkizip, barlyǵynda jeńiske jetken. 19 kezdesýde qarsylastaryn nokaýtqa túsirgen. Qazirgi ýaqytta orta salmaqtaǵy WBA Inter-Continental, WBO NABO (WBO Inter-Continental: WBA Fedelatin jáne WBA Fedecari belbeýleriniń ıegeri. Onyń qarsylasy kanadalyq Brendon Kýk.
2. Janqosh Turarov – jartylaı orta salmaqtaǵy Ulttyq boks assosıasynyń (NBA) chempıony. Kásipqoı boksta 21 kezdesý ótkizip, barlyǵynda jeńiske jetken. 15 ret qarsylasyn nokaýtqa túsirgen.
3. Jánibek Álimhanuly – eńbek sińirgen sport sheberi, Rıo-de-Janeıro qalasynda ótken Olımpıada oıyndarynyń shırek fınalyna shyqqan, Azıa oıyndarynyń, Azıa birinshiliginiń jáne álem chempıonatynyń jeńimpazy. Kásipqoı boksta bir kezdesý ótkizip, jeńiske jetken.
4. Meıirim Nursultanov – orta salmaqtaǵy elimizdegi eń talantty boksshylardyń biri. Kásipqoı boksta úsh kezdesý ótkizip, úsheýinde de jeńiske jetti. Sońǵy kezdesýin 15 shilde kúni AQSH-tyń Los-Andjeles qalasynda amerıkalyq Lennı Dardarǵa qarsy ótkizip, jeńiske jetti.
5. Rýslan Myrsataev – halyqaralyq dárejedegi sport sheberi. Álem chempıonaty men Olımpıada oıyndarynyń shırek fınalyna shyqqan. Bes maýsym boıy Búkilálemdik boks serıasynda (WSB) óner kórsetetin elordalyq «Astana arlandary» klýbynyń namysyn qorǵaǵan. Kásipqoı boksta eki kezdesý ótkizip, ekeýinde de jeńiske jetken.
6. Álı Ahmedov – kásipqoı boks alańynda jeti kezdesý ótkizip, barlyǵynda jeńiske jetken.
7. Aıdos Erbosynuly – kásipqoı boksta alty kezdesý ótkizip, barlyǵynda jeńiske jetken.
8. Dımash Nıazov – Nú-Iork qalasynyń polısıa qyzmetkeri. Kásipqoı boksta 11 kezdesý ótkizip, barlyǵynda da qarsylastarynan ústem túsken. Týǵan jerinde birinshi ret kezdesý ótkizgeli otyr. Óıtkeni, Dımash 13 jasynda AQSH-qa kóship ketken. Degenmen ol bokstyń álippesin Shymkent qalasynda Qazaqstannyń eńbek sińirgen jattyqtyrýshysy Nurǵalı Safıýllınnen úırengen.
9. Nursultan Jańabaev – WBA China belbeýiniń ıegeri. Kásipqoı boksta úsh kezdesý ótkizip, úsheýinde jeńiske jetken.

Jekpe-jek keshiniń bas demeýshisi QR mádenıet jáne sport mınıstrligi, Astana ákimshiligi, Astana-EKSPO-2017 kórmesi, «Samuryq-Qazyna» UÁQ, Zhersu korporasıasy, Nelson Promoutins jáne Qazaq Promoutions kompanıalary.