Sandardyń siz týraly jasyrǵan qupıasyn bilmes buryn nýmerologıa ǵylymyna sholý jasasaq.
Nýmerologıa - sandar týraly ejelgi ǵylym. Dálirek aıtsaq, sandardyń sizdiń ómirińizge, minezińizge, taǵdyryńyzǵa, bolashaǵyńyz ben aınaladaǵy bolyp jatqan jáıttarǵa áseri. Nýmerologıa adamǵa qaı baǵytta jumys jasaý kerek ekendigin de anyqtap bere alady. Tipti, adamnyń qaı sport túrine beıim ekendigin, qandaı mýzykany unatatyndyǵyn, taǵamǵa degen talǵamyn da daralaıdy. Sandar jeke turyp bir bólek, birge turyp basqa maǵyna beredi.
Qazirgi tańda nýmerologıanyń túr-túri bar. Mysaly: týǵan kún nýmerologıasy, Pıfagordyń sandar fılosofıasy, úndi nýmerologıasy, densaýlyq nýmerologıasy t.s.s. Tipti, esimińizdiń de sizden jasyrǵan nýmerologıalyq syry bolady. Ár adamnyń ózine jaqyn sany, nómiri bolatyn jaǵdaılar jeterlik. Estigen bolarsyz? Keıde kóp kezdesetin sandarǵa mán bermeı óte shyǵamyz. Alaıda, olardyń da sizder jaıly aıtatyny bar eken...
0 – materıaldyq tabıǵattyń qupıalaryna toly. Bul nómir jan-jaqty energıany, úılesimdilik pen aqıqatty bildiredi. Eger aldyńyzdan qaıtalanǵan nólder kezdesetin bolsa, ózińizdi rýhanı jaǵynan damytý qajet ekenin umytpaǵaısyz. Týa bitken múmkindikter men kúsh-qýattyń belgisi bolǵandyqtan, bul sanǵa qatysy bar adamdar talantty ári qaısar bolady. Alaıda, ony qalaı qoldaný kerektigin jete túsinbeıdi.
1 – Oılaý qabiletiniń tıanaqtylyǵyn bildiredi. Basqalardyń oıyna qulaq aspaıtyn, jeke tájirıbesine súıenetin san. Batyldyq, qaısarlyq pen tapqyrlyq tán. Adamdardy basqarý men olardy kóndirý qıynǵa soqpaıdy. Naǵyz kóshbasshynyń belgisi. Alaıda, bul sannyń jaman qasıetteri de joq emes. Mysaly, shekten tys senimdilik órkókirektik pen qyrsyqtyqqa ákelip soǵady.
2 – meıirimdilik, jomarttyq, naqtylyq pen túsinistikti bildiredi. Azdap romantızm men ıntýısıa bar. Jalpy, esh kemshiligi joq perishte syndy dersiń. Ómirdegi turaqtylyq pen tepe-teńdikti bildirgenimen, barlyǵy únemi jaqsy bola bermeıdi. Sol sebepti, mundaı qasıetterge tán adamdy kezdestirý tipti múmkin emes.
3 – ómirsúıgishtik pen optımızmniń belgisi. Bul sanmen baılanysy bar jan ózine senimdi jáne usaq-túıekke mán bermeıdi. Biraq, sizge bólingen kóńil men ýaqyt az mólsherde bolsa, ómirden túńilip ketýińiz ǵajap emes. Ózgelerdiń tarapynan sizge únemi qyzyǵýshylyq bolýy kerek, qarsy jaǵdaıda siz álemdi qatigez dep tanısyz.
4 – bul sannyń qasıetterin tek erlerge tán dep aıtýymyzǵa bolady. Biraq, bul qasıetter kóbine áıel zatynyń boıynda kezdesedi. Tózimdilik, eńbekqorlyq pen óz prınsıpterine adaldyq. Bul ómirde eshnárseniń tegin kelmeıtinin, barlyq nárseniń ótemi bar ekenin jaqsy túsinetin adamdar. Kez kelgen ortada belsendilik tanytyp, ne isteý kerektigin naqty biletin jandardyń sany. Sizdi barlyǵy qurmettegenmen, jaqtaıtyndar sanaýly. Bul sanmen týylǵandar kóbinese óte qyrsyq , ári ishpystyrarlyq bolyp keledi. Olar óz degenderin dáleldep, basqalardyń qatelikterin betine basqandy asa unatady. Adamdarǵa kúmánmen qarap, ýaqytty bos ketirmeıdi.
5 – sandardyń arasyndaǵy eń myqtysy. Ómirge degen beıimdilik, tapqyrlyq pen tabıǵaty erekshe zattarǵa degen qushtarlyqty bildiredi. Sizdiń energıańyz kez kelgen ózgeristi ońaı ótkerýge kómektesedi ári kez kelgen jaǵdaıdan ońaı shyǵyp ketetinińizge bek senimdisiz. Qandaı jaǵdaı bolmasyn, qoryqpaı, alǵa umtylyńyz. 5 sany sizge kómektesedi!
6 – bul sannyń jaqsy qasıeti – adamdarǵa degen erekshe yqylastyń bolýy. Qyzmette siz óte qatal ári talapshyl bastyq bolýyńyz múmkin, alaıda, adamnyń ómiri men jeke basyn qatty qurmetteısiz. Dúnıedegi eń baǵaly zat sóz erkindi dep bilesiz. Qolyńyzdaǵy bardy berýge daıyn janashyr adamdar osy sannyń menshiginde. Sizdiń jaqyndaryńyz sizge únemi ıyq tireı alatynyn jaqsy biledi. Sonymen qatar, basqalardyń qamy úshin óz qyzyǵýshylyqtaryńyzdan bas tartýǵa deıin barasyz. Ol óz kezeginde sizge kóptegen qıyn máseleler týǵyzýy múmkin.
7 – bul sannyń basty ereksheligi oılaý qabileti men ishtegi tynyshtyqtyń joǵarǵy deńgeıde tanylýy. Kez kelgen qıyn suraqtardyń jaýabyn da esh qıyndyqsyz taýyp alady. Ómirde bolatyn ártúrli jaǵdaılarda bul qasıet septigin tıgizedi. Jaman qasıetteri: sypaıylyq bolmaıdy, jaqsy minez atymen joq. Ol týraly el ne oılaıtyny múlde qyzyqtyrmaıdy. Qolaıly sát týǵan kezde basqalardan erekshe ekenin eske salyp otyrady. Sol arqyly dostarynan aıyrylyp, adamdarmen qarym-qatynasy qıyndaı túsedi.
8 – iskerlik sheberlik pen batyldyq osy sanǵa tán qasıet. Osy sanmen týǵan adamdar álemdi basqarady. Olar úshin alynbaıtyn asý, berilmeıtin qamal joq. Alǵa qoıǵan maqsaty men oǵan jetetin joldy naqty kóredi. Sol sebepti, qashan ne isteý kerek ekendigin jaqsy biledi. Qatigez bolǵanmen, adal. Jaqyndary men súıiktileri úshin odan asqan qamqorshy joq. Jaǵymsyz jaǵy baǵynyshty adamdardy qanaý men órkókirektigi ony únemi aıaqtan shalady. Qyzmettegi qataldyǵy kúndelikti ómirdegi ımıjge óz zıanyn tıgizýi múmkin.
9 – asa meıirban jandar, adamdardy birdeı jaqsy kóredi, olarǵa kómek qolyn sozýǵa qýana-qýana daıyn. Tabıǵatyńyzdan adamdardy jaqyn tartasyz, olar da sizben dos, seriktes, áriptes bolýǵa umtylady. Degenmen, aınaladaǵy barlyq narseni dramaǵa aınaldyrǵandy ádetke aınaldyrǵan. Barlyǵy jaqsy bolsa, sizden shýaqty jan tabylmas. Biraq, kishkene nárse úshin janjal shyǵaryp, qorshaǵan ortańyzdy tereń depressıaǵa ushyratýyńyz ǵajap emes.
