Tarazdaǵy kóshi-qon polısıasy arqyly qujat rásimdegen qandastar endi elden qýylýy múmkin. Óıtkeni ár elden atajurtqa qonys aýdarǵan 250 adamǵa berilgen yqtıar hattyń eki jyldan keıin jaramsyz ekeni anyqtalǵan. Sondyqtan bul kisilerdiń endi Qazaqstanda júrýi zańsyz. Osylaısha quzyrly oryn ókilderiniń kesirinen tyǵyryqqa tirelgen aǵaıyn ne isterin bilmeı, bas qatyrýda, dep habarlaıdy Qamshy.kz aqparat agenttigi ktk telearnasyna silteme jasap.
Almatydan arnaıy kelgen bul tórt azamat tóbesinen jaı túskendeı boldy. Óıtkeni 2015 jyly Qytaıdan kóship kelgende, Qazaqstanda júrýleri úshin tólqujat esebinde berilgen yqtıar hat jaramsyz bolyp qalǵan. Mundaı sumdyqtyń beti turǵylyqty jer boıynsha anyqtama alý kezinde ashylǵan.
Qanat Berikbol:
– Biz jına degendi jınadyq. Ber degenin berdik. Endi berip alyp bir jyldan soń qujat jaramsyz degenderi bizge qajet emes. Men Qazaqstanǵa azamattyq alaıyn dep keldim, men Qytaıǵa qaıta keteıin dep kelgenim joq. Azamattyq kerek maǵan.
Ata jurtty ańsap kelgen aǵaıyn endi eki ortada tentirep qaldy. Qazir azamattyq almaq túgili, Qazaqstanda aıaq basyp júrýdiń ózi muń. Iaǵnı berilgen qujat zańsyz dep tabylǵan soń onyń kúshi joıylǵan. Al Qytaıdan kelgenderdiń jaǵdaılary tipten qıyn.
Bajıgúl Qajybekqyzy:
– Qytaılar qabyldamaıdy. Olar zań shyǵaryp qoıǵan: óz erkimen bizdiń ruqsatymyzsyz azamattyq almaısyń dep. Bular barsa tóteleı olardyń qurbandyǵy sottalý kerek. Qujattyz bir kúnde júre almaıdy. Qytaıǵa bara almaıdy da, bulardyń taǵdyry bosqyn nemese túrme jaǵalaýmen ótedi.
Eki ortada «bosqyn» kúıine túskenderdiń aıtýynsha, qalalyq kóshi-qon polısıasy basqarmasyndaǵylar bul mekemeni bıznes ortalyǵyna aınaldyryp alǵan. Jalpy, osy quzyrly oryn ókilderiniń kesirinen 250 adamnyń yqtıar haty jaramsyz dep tabylǵan. Onyń kóbi bul jaıynda áli estimepti. Qazir osy bylyqqa qatysy bar degen kúdikpen qalalyq kóshi-qon polısıasy basqarmasynyń basshysy birneshe ınspektorymen birge qamaýǵa alynyp, tergeý júrgizilýde.
Bekzat Dosybaev, Jambyl oblystyq İİD kóshi-qon polısıasy basqarmasynyń ınspektory:
– Naqty qazir eshteme aıta almaımyn. Qyzmettik tekseris júrgiziledi. Qazirgi tańda qujat zańsyz berilgendigi úshin, ishki ister organdarynyń qyzmetkerleri isti bolyp jatyr ǵoı. Sondyqtan da sol kisilerdiń kinási desek te bolady.
Kóshi-qon polısıasynyń kesirinen endi 250 adamnyń taǵdyry qyl ústinde. Tekserý kezinde tólqujat esebinde júretin yqtıarhattyń jalǵan ekendigi rastalsa, onda zańǵa sákes 250 qandas elden shyǵarylýy tıis. Al beıresmı málimetterge súıensek, jalǵan qujat el boıynsha tek Jambyl oblysynda jasalyp, azamattar tek sodan soń ár óńirge jiberilip otyrǵan.
