Qazaqstan Respýblıkasynyń Prezıdenty N.Á.Nazarbaevtyń «Bolashaqqa baǵdar: Rýhanı jańǵyrý» baǵdarlamalyq maqalasyn júzege asyrý maqsatynda 2017 jyly 23 tamyzda Almaty mýzeıinde «Qoljetimdi mýzeı» atty múmkindigi shekteýli jandarǵa arnalǵan turaqty ekspozısıasynyń ashylýy ótedi, dep habarlaıdy Qamshy.kz aqparat agenttigi mýzeıdiń baspasóz qyzmetine silteme jasaı otyryp.

İs-sharanyń negizgi maqsaty kelýshilerdiń barlyq kategorıasy úshin mýzeı ekspozısıasy men baǵdarlamalaryna teń qoljetimdilikti qamtamasyz etetin ortany qalyptastyrý.

Búginde Almaty qalasynda múmkindigi shekteýli jandardyń sany 47 myńdy quraıdy. Olardyń barlyǵy mýzeıde bolmaǵan, tipti keıbireýi mádenı oryndarǵa barǵanda olarǵa kórsetiletin jeńildikter týraly bilmeıdi. 2015 jyly Qazaqstan Respýblıkasynda ratıfıkasıalanǵan múmkindigi shekteýli jandardyń quqyqtary týraly BUU Konvensıasyna sáıkes «memleket-qatysýshylar múmkindigi shekteýli jandardyń mádenı ómirge basqalarmen teń quqyǵyn moıyndaıdy jáne múmkindigi shekteýli jandardyń qoljetimdi formatta teatr, mýzeı, kınoteatr, kitaphana sekildi mádenı oryndarda mádenıet týyndysyna qoljetimdiligin, sondaı-aq ulttyq, mádenı qundylyǵy bar eskertkishter men nysandarǵa barynsha joǵary qoljetimdilikke ıe bolýyn qamtamasyz etý úshin barlyq sharalardy qabyldaıdy».

İs-shara baǵdarlamasynda  múmkindigi shekteýli jandardyń barlyq kategorıasy úshin qoljetimdiligi boıynsha qyzmetter usynylady: mýzeı qorynan taktıldi eksponattar, aýdıogıdter, tıflokommentarıı, Braıl shrıftimen jolserikter, arheologıalyq artefaktilerdiń relefti sýretteri, zaldardyń taktıldi mnemosyzbalary, sýrdoaýdarmamen ekskýrsıalar jáne t.b.

Ashylý saltanatyna Almaty qalasynyń ákimi B. Baıbek, múmkindigi shekteýli jandar máselesi boıynsha ákim keńesshisi V. Alaev, «Shyraq» múmkindigi shekteýli áıelder Asosıasıasy» Qoǵamdyq Qorynyń tóraıymy, Almaty qalasy máslıhatynyń depýtaty L. Qaltaeva, Qazaqstan múmkindigi shekteýli jandar uıymy Odaǵynyń tóraǵasy A. Amanbaev, «Arjan» Qoǵamdyq Qorynyń dırektory K. Omarova jáne t.b. qatysady.