«EKSPO-2017» halyqaralyq kórmesi 3 mıllıonynshy meımanyn kútip aldy. Mártebeli meıman bolý baqyty RF azamaty, «Orta jáne shaǵyn eksportshylardyń eýrazıalyq qaýymdastyǵy» dırektory mindetin atqarýshy Iýrıı Shýrygınge buıyrdy, dep habarlaıdy Qamshy.kz aqparat agenttigi QazAqparatqa silteme jasap.
«EKSPO-2017» kórmesiniń basty operasıalyq ortalyǵynyń qyzmetkerleri kórmeniń 4 kirý esigin qadaǵalap otyr. Kópshilik baqylap otyrǵan jańalyqty jarty saǵat ýaqyt kútýge týra kelgen. Aqyry bılettiń sońǵy 4 nómiri arqyly kórme qyzmetkerleri 3 mıllıonynshy kelýshiniń kim ekenin anyqtady. Ol kórmeniń Orynbor kóshesi jaǵynda ornalasqan esikten kirdi.
Álemdik dárejedegi halyqaralyq kórmeniń 3 mıllıonynshy kelýshisi bolý baqyty Reseı azamaty Iýrıı Shýrygınge buıyrǵan eken. Meıman Máskeýden «Eýrazıa aptasy» sharasyna arnaıy kelgen.
«Mundaı sáttilikti kútken joqpyn, álbette. «Eýrazıalyq apta» sharasynan qashyp ketip, kórmege kelgen betim. Kúni keshe ǵana «EKSPO-2017» halyqaralyq kórmesine kirip, Qazaqstannyń pavılonyna kirip shyqqan edim. Biraq Reseıdiń pavılonyn tamashalap úlgere almaı kettim. Osy sebepti kórmege qaıta kelgen betim. Qazaqstanǵa tórtinshi ret kelip otyrmyn. Ártúrli óńirlerden kásipkerlerdi ákelip, seriktesterdi alyp kelgen edik. Qazaqtyń ulttyq taǵamdaryn óte jaqsy kóremin», – deıdi kórmeniń 3 mıllıonynshy kelýshisi.
Joly bolǵan meımandy EKSPO basshysy Ahmetjan Esimov quttyqtap, kórmeniń sımvoly men planshet syıǵa tartty.
«3 mıllıonynshy meıman keldi. Osy aptanyń sońynda keletinin kútip otyrǵanbyz. Kórmeni tamashalaýshylardyń sany kóbeıip keledi. Úsh mıllıonshy meımandy 21 kún kúttik», – dedi Ahmetjan Esimov.
Eske sala ketsek, halyqaralyq kórmege 2 mıllıonynshy kelýshi 4 tamyzda kelgen bolatyn. Oral qalasynyń Ǵaısa Jumalıev atty kásipkeri kórmeniń 2 mıllıonynshy meımany atanyp, ony «Astana EKSPO-2017» ulttyq kompanıasynyń basqarma tóraǵasy Ahmetjan Esimov quttyqtaǵan edi. Mártebeli meımanǵa planshet, qulaqqap pen kórmege lımıtsiz bılet syıǵa tartylǵan bolatyn.
