Búgin Ulttyq ulannyń elorda túbindegi jedel quramasynda qyzmet babynda qaısarlyqtyń aıqyn úlgisin kórsetken 9 áskerı qyzmetshini qurmetteý keshi ótti dep habarlaıdy Qamshy.kz aqparat agenttigi Ulttyq ulan baspasózqyzmetine silteme jasap. Tótenshe jaǵdaılar komıteti tóraǵasynyń buıryǵymen sarbazdar «Órtte kórsetken qaısarlyǵy úshin» medalimen, «Qutqarý operasıalaryna belsendi qatysqany úshin» jáne İİİ dárejeli «Qutqarýshy» keýde belgilerimen marapattaldy. Atalmysh is-sharaǵa Ulttyq ulan Bas qolbasshylyǵy, Tótenshe jaǵdaılar komıtetiniń ókilderi, órtengen kópqabatty úıdiń turǵyndary, ójettik tanytqan sarbazdardyń týǵan-týystary jáne 5573 áskerı bóliminiń jeke quramy qatysty. 

- Jedel quramanyń jaýyngerleri kúndelikti qyzmetimen elordamyzdyń tynyshtyǵyn, azamattarymyzdyń qaýipsizdigin kúzetip otyr. Oqys oqıǵa, tótenshe jaǵdaı kezinde beıbit turǵynnyń ómirine beıjaı qaramaı, óz bastaryn qaýipke tigip, erliktiń úlgisin kórsetti, mine. Búgingi marapattar – jaýyngerlerge berilgen laıyqty baǵa dep esepteımin. «Elim dep eńiregen eriń bolmasa, erin qadirleıtin el qaıdan bolmaq» demekshi, ulandardyń qyzmetin elep, basshylyqtar jeedel túrde buıryq shyǵaryp, basqa da sarbazdarǵa úlgi etip otyr, - deıdi Ulttyq ulannyń Tárbıe jáne áleýmettik-quqyqtyq jumystar bas basqarmasyna qarasty Til saıasaty jáne aqparattandyrý bóliminiń bastyǵy podpolkovnık Álisher Ábdirásilov. Ol sondaı-aq, batyl da erjúrek azamattardy tárbıelep-ósirgenderi úshin sarbazdardyń jaqyndaryna alǵys bildirdi.

Alǵyr azamattar: áskerı jasaq kezekshisi aǵa leıtenant Jeńis Quramysov, patrúldik top bastyǵy kishi serjant Beksultan Nıazymbetov, áskerı jasaq bastyǵy qatardaǵy Almas Qalymtaı jáne patrúlder – Baýyrjan Quspanov, Suraǵan Serǵalıev, Naǵashbek Úsenbaı, Dáýlet Keterkeev, Ersultan Abdýsamatov, Álkeı Qurbanbek Ulttyq ulan Bas qolbasshysynyń buıryǵymen İİ dárejeli «Ulttyq ulan qyzmetiniń úzdigi», Ásker sımvolıkasy belgilengen qolsaǵattarmen, 5573 áskerı bólim komandıriniń buıryǵymen «Qoǵamdyq tártipti saqtaǵany úshin» keýde belgilerimen jáne gramotalarmen marapattaldy.

• Jubaıym jylap habarlasqanda, ne isterimdi bilmedim. Men kelgenshe jaýyngerler áıelim men balalarymdy da, múlkimizdi de saqtap qalypty. Buryn da estip jatamyz ǵoı, Ulttyq ulannyń jigitteri adamdarǵa kómektesipti dep. Bul joly ózim kýá bolyp otyrmyn. Tónip turǵan qaýipten janymyzdyń aman qalǵany aldymen Allanyń, sosyn osy azamattardyń arqasy. Der kezinde kómekke kelgen sarbazdarǵa da, olardy osylaı tárbıelegen komandırlerine de otbasymyzdyń atynan úlken alǵys aıtamyz, - deıdi otaǵasy Sh. Erketaı.

Oqıǵa 21 qyrkúıek kúni keshki 19.30 shamasynda Astana qalasynyń Almaty aýdanyn Kenesary kóshesi 51 úıdiń 3-qabatynda bolǵan. Sol mańda kóshe tártibin qadaǵalap júrgen ulandyqtar jedel áreketimen turǵyndardy qaýipsiz jerge shyǵaryp, órtti aýyzdyqtaǵan.