Qazaqstan Respýblıkasy Mádenıet jáne sport mınıstrligi Tilderdi damytý jáne qoǵamdyq-saıası jumys komıteti men Sh.Shaıahmetov atyndaǵy tilderdi damytýdyń respýblıkalyq úılestirý-ádistemelik ortalyǵy uıymdastyrǵan dástúrli baıqaýda el aýmaǵyndaǵy 300-den astam jas baq synady. Aýdandyq, qalalyq, aımaqtyq irikteýden irkilmeı ótken 15 kórkemsóz oqý sheberi búgin Aqtóbe qalasynda aqtyq saıysta óner kórsetti. Baıqaý shartyna saı alǵashqy aınalymda úmitkerler qazaqtyń belgili jazýshylarynyń kórkemdigi joǵary prozalyq shyǵarmalarynan úzindi oqysa, ekinshi kezeńde poezıalyq shyǵarmalardy kórkemsóz oqý talaptaryna saı oryndap shyqty.
Qatysýshylardyń óneri men bilim deńgeıin ǵalym, memleket jáne qoǵam qaıratkeri Amangeldi Aıtaly tóraǵalyq etken qazylar alqasy baǵalady. Qazylar sheshimimen Aqmola oblysynyń namysyn qorǵaǵan Gúlzat Qaıyrgeldi bas júldeni ıemdenip, 300 000 teńgeniń sertıfıkatyn utyp aldy.
- Baıqaý óte joǵary dárejede ótti. Barlyq qatysýshylar óte talantty, daryndy. Rasyn aıtsam, qazylar alqasynyń tańdaýy maǵan túsetindigine de kúmándi boldym. Dese de, eńbegim baǵalanyp, joǵarǵy nátıje kórsetkendigi qýantady. Tilektestik bildirgen barlyq kórermenge alǵysymdy aıtamyn,- deıdi G.Qaıyrgeldi.
Júldeli İ orynǵa Dildá Haıran (Qostanaı oblysy) laıyq tanylsa, İİ oryndy mańǵystaýlyq Álibek Taǵaberdın enshiledi. Úzdikter úshtigin Meıirjan Álbekov (Shyǵys Qazaqstan) pen Orazbek Bahathan (Pavlodar) túıindedi. Nursultan Otar, Áıgerim Baıysbek, Janar Naqovalarǵa yntalandyrý sertıfıkaty men 50 000 teńge tabystaldy. Barlyq baıqaý qatysýshylary Aqtóbe oblystyq tilderdi damytý basqarmasynyń "Alǵysqatymen" marapattaldy.
