Qyrǵyzstan bas prokýrory Osh qalasynda daýystardy satyp alý faktisi boıynsha qylmystyq is qozǵady dep habarlaıdy Qamshy.kz aqparat agenttigi. Quzyrly mekeme málimetine qaraǵanda, eki azamat qala turǵynyna prezıdenttikke "úmitker Ómirbek Babanovty qoldaý úshin eki myń som usynǵan".
Bas prokýratýra baspasóz qyzmetiniń habarlaýynsha, úgit-nasıhat naýqany kezinde daýys satyp alý faktisi boıynsha alǵash ret qylmystyq is qozǵalyp otyr. İs Osh qalalyq sotyna joldandy. Ol 3 qazanda qaralady. Zań buzǵandar 300 myń som aıyppul tóleýden bastap bes jylǵa deıin bas bostandyǵynan aırylý jazasyn alýy múmkin.
Daýys satyp alý faktisine qatysty taǵy bir materıal Bishkek qalasynyń aýdandyq sotyna joldandy. Astanalyq bir turǵyn mılısıaǵa "Onýgýý-Progress" partıasy shtabynyń ókili saılaýshylar taýyp berý úshin 2 myń som usyndy" dep aryzdanǵan.
Qyrǵyzstanda prezıdent saılaýy 15 qazanda ótedi.
