«Qazaqstan» teleradıokorporasıasy Asia-Pasific Broadcasting Union nemese qysqasha ABU dep atalatyn Azıa-Tynyq muhıttyq habar taratý odaǵyna endi, dep habarlaıdy Qamshy.kz aqparat agenttigi.

Atalmysh múshelik «Qazaqstan» korporasıasyna ABU ótkizetin san túrli sharalaryna qatysýǵa jol ashady.

ABU odaǵymen qarym-qatynastyń aıasynda Azıanyń 34 elinde stansıalary bar spýtnıktik Asiavision televıdenıesimen aqparat almasatyn bolady. Odan bólek, ABU óz quramyna kirgenderge túrli halyqaralyq jobalar aıasynda baǵdarlamalyq, zańgerlik, konsaltıńtik, basqarýshylyq máseleler boıynsha kómek berýge ázir. Jáne teleradıokorporasıa qyzmetkerlerinde ABU uıymdastyratyn halyqaralyq semınarlar men trenıńterge qatysýǵa múmkindik paıda bolady.

«Qazaqstan» teleradıokorporasıasy álemdik telenaryqqa shyǵýdy kózdeıdi. Sondyqtan halyqaralyq seriktestikterdiń damýyna úlken mán beredi. Al ABU-ǵa múshe bolý – osy strategıa aıasyndaǵy mańyzdy qadam. Sebebi, bul yntymaqtastyq ABU odaǵynyń quramyndaǵy 69 memlekettegi 272 teleradıokompanıalarmen tyǵyz iskerlik qarym-qatynas ornatýǵa septigin tıgizbek.

Aıta keteıik, Asia-Pasific Broadcasting Union komersıalyq emes kásibı qaýymdastyǵy 1964 jyly qurylǵan. Ol Azıa men muhıt aımaǵy elderiniń habar taratý uıymdaryn biriktiredi. Atalmysh odaqtyń maqsaty – habar taratýshylar arasyndaǵy yntymaqtastyqty nyǵaıtý.