QR Premer-Mınıstri Baqytjan Saǵyntaev «Qazaqstan Respýblıkasynyń Premer-Mınıstri, Premer-Mınıstriniń orynbasarlary jáne Premer-Mınıstri Keńsesiniń Basshysy arasynda mindetterdi bólý týraly» ókimge qol qoıdy, dep habarlaıdy Qamshy.kz aqparat agenttigi Premer-mınıstrdiń resmı saıtyna silteme jasap.
Qujatqa sáıkes, Premer-Mınıstrdiń qaraýyna ekonomıkalyq, qarjy, fıskaldyq jáne keden saıasatynyń, memlekettik búdjettiń startegıalyq máseleleri, qorǵanys jáne quqyqtyq tártip, munaı-gaz sektoryn damytý, memlekettik aktıvterdi basqarý, memlekettik organdardyń ákimshilik reformasyn iske asyrý, memleketaralyq qatynastar men halyqaralyq yntymaqtastyq, sheteldik ınvestısıalar tartý, ınvestısıalyq ahýaldy jaqsartý jáne basqalary kiredi.
QR Premer-Mınıstriniń Birinshi orynbasary Asqar Mamınnyń mindetterine ekonomıkany jedel basqarý jáne óńirlik saıasat, kólik ınfraqurylymyn jáne logıstıkany damytý, qurylysty damytý jáne turǵyn úı-kommýnaldyq sharýashylyqty jańǵyrtý máseleleri jatady. Sonymen qatar Asqar Mamın qorǵanys-ónerkásip keshenin damytý, tótenshe jaǵdaılar jáne jumyldyrý jumysy, ǵarysh qyzmeti, energıa únemdeý jáne energıa tıimdiligin arttyrý, energıanyń jańartylatyn kózderi, kómir ónerkásibi, atom ónerkásibi jáne ıadrolyq energetıka, ınovasıalar, tehnıkalyq retteý, elektr energetıkasy, geologıa jáne jer qoınaýyn paıdalaný, munaı hımıasy, eksporttyq baqylaý, qorshaǵan ortany qorǵaý, jylytý maýsymyna daıyndyq jáne ony ótkizý jáne basqa da máseleler kiredi.
Premer-Mınıstrdiń Birinshi orynbasarynyń qyzmet aıasyna sonymen qatar arnaıy ekonomıkalyq jáne ındýstrıalyq aımaqtardy damytýdy úılestirý, Eýrazıalyq ekonomıkalyq odaq sheńberinde yntymaqtastyq máseleleri jatqyzylady.
QR Premer-Mınıstriniń orynbasary Erbolat Dosaevtyń mindetine el ekonomıkasyn Úshinshi jańǵyrtýdy jobalyq basqarý, memlekettik josparlaý júıesi, qarjy sektoryn damytý, makroekonomıkalyq, búdjet, salyq jáne keden saıasaty, SHOB pen memlekettik-jekeshelik áriptestikti damytý, sonymen qatar bilim berý men ǵylymdy damytý, densaýlyq saqtaý, áleýmettik jańǵyrtý, jumyspen qamtý, din, týrızm, mádenıet jáne sport, demografıa jáne kóshi-qon saıasaty, tarıf saıasatyn úılestirý jáne basqa da máseleler bekitilgen.
QR Premer-Mınıstriniń orynbasary Asqar Jumaǵalıev salalardy sıfrlandyrý jáne sıfrlyq ekonomıkany damytý, aqparattandyrý, baılanys jáne aqparattyq qaýipsizdik, «elektrondyq úkimetti», aqparattyq tehnologıalardy damytý, memlekettik kórsetiletin qyzmetterdi avtomattandyrý, elektrondyq komersıa, spýtnıktik baılanysty damytý, memlekettik aqparattyq saıasatty iske asyrý jáne basqa da máselelerdi úılestiredi.
Premer-Mınıstrdiń orynbasary Asqar Myrzahmetov agroónerkásiptik keshen, jer qatynastary, sý resýrstary, orman sharýashylyǵy, janýarlar álemi, aýyl sharýashylyǵy mashınasyn jasaý, aýylda nátıjeli jumyspen qamtý jáne basqa da máselelerge jetekshilik etedi.
