QR Aýyl sharýashylyǵy vıse-mınıstri Gúlmıra Isaeva keıbir sarapshylardyń qysta kartop baǵasy 300 teńgege jetedi degen boljamyna qatysty pikir bildirdi, dep habarlaıdy Qamshy.kz aqparat agenttigi ASHM baspasóz qyzmetine silteme jasap.
«Azyq-túliktiń negizgi 25 túri boıynsha biz ózimizdi shamamen 80 paıyzǵa qamtamasyz etip otyrmyz. Kartoppen de ózimizdi tolyqtaı qamtamasyz ete alamyz. Árıne, ónim bolmaǵan jyldarda óndiris kólemi tómendeıtindigi belgili. Biraq bul rette naryq ózin-ózi tolyqtyryp otyrady. Qazaqstan aýmaǵyna syrttan kartop alyp kelgen kezder de bolǵan. Bul baǵany birshama turaqtandyrýǵa septigin tıgizedi. Menińshe, mundaı jaıt baǵa ósimine ákep soqtyrmaýy tıis. Iaǵnı, kartop qoljetimdi ári aqylǵa syıymdy baǵada satylady. Sáıkesinshe 300 teńge, mundaı baǵa qysta da bolmaıdy», - dedi Gúlmıra Isaeva búgin Úkimet úıinde ótken baspasóz máslıhatynan keıin BAQ ókilderiniń saýalyna oraı.
Buǵan deıin irili-usaqty saýdagerlerdiń taýar baǵasyna qoıatyn ústeme baǵasyn eskersek, bıyl qysta Qazaqstandaǵy 1 keli kartoptyń baǵasy 250-300 teńgege deıin jetýi múmkin ekendigi habarlaǵan bolatyn.
Bıyl sharýalar kartop baǵasy kúrt qymbattaıdy dep otyr. Buǵan sebepter kóp, máselen, elimizdegi jáne kórshi elderdegi aýa raıy bıyl eginge qolaısyz keldi, ónimdi jetildirýge ketetin shyǵyndar kóbeıgen. 1 gektar alqapta kartop ósirý úshin ortasha 1 mln teńge jumsaldy, al ortasha ónimdilik gektaryna 230 sentnerdi qurady. Dál qazir 1 keli kartoptyń kóterme baǵasy 55 teńge, al ádette kúz mezgilinde 35 teńgeden aspaıtyn.
