Dana halqymyz «Aýzy qulyp sandyqty tis ashpasa, til ashady» degen. Osydan-aq, til ólsheýsiz qazyna, órisi keń álem ekendigin uǵynǵandaı bolamyz. Elbasy N.Á. Nazarbaev óziniń «Bolashaqqa baǵdar: rýhanı jańǵyrý» maqalasynda «Eger jańǵyrý eldiń ulttyq-rýhanı tamyrynan nár almasa, ol adasýǵa bastaıdy» degen bolatyn. Demek, ulttyń rýhanı tamyrynyń bastaýy da tilden ekeni sózsiz. Elimizde memlekettik tildiń qoldanys aıasyn keńeıtý, ony barlyq otandastarymyzdyń bilýi, sóz joq qazaqstandyq patrıotızmdi qalyptastyrady.
«Til sheberi-2017» dástúrli baıqaýy jahandyq órkenıet pen elimizdiń damý baǵytyna saı úsh tildi – qazaq, orys jáne aǵylshyn tilderin jetik meńgergen, jan-jaqty bilimdi, óz salasynyń kásibı mamany dep tanylǵan memlekettik qyzmetshi jastardy anyqtap, qoldaý kórsetý maqsatynda júzege asyp keledi. Sheber sóıleý-úlken óner. Ásirese memlekettik qyzmetshi jastardyń til sheberliginiń kórkemdigi óte qajet-aq. Sebebi, tildi tigisin jatqyzyp, durys qoldanǵan sóz óneri arqyly kózdegen maqsatyńa bir taban jaqyndaı túsesiz. Ol úshin tilińizden bal tamyp turýy kerek.
Atalmysh baıqaýǵa talabyn ushtap, úmitin úkilep kelgen jastarǵa aqjarma tilegin aqtaryp, til báıgesinde myńnan tulpar, júzden júırik shyǵýyna aq jol aıtqan Sh. Shaıahmetov atyndaǵy tilderdi damytýdyń respýblıkalyq úılestirý-ádistemelik ortalyǵynyń dırektory Erbol Erdembekuly Tileshov saıystyń shymyldyǵyn ashty. Aıtýly bilim men biliktilik báıgesine memlekettik ortalyq atqarýshy organdarda qyzmet etetin 21-29 jas aralyǵyndaǵy 18 úmitker qatysty.
Baıqaý shartyna saı qatysýshylar «Tusaýkeser», «Ulttanym», «Ónertanym» bólimderi boıynsha baq synady. Basty ustanym- olardyń úsh tildi meńgerý deńgeıi men tildik normany saqtaýy, orforgafıalyq jáne orfoefıalyq saýattylyqtaryna kóńil aýdaryldy. Sonyń ishinde memlekettik tildi jetik bilýi qazylar alqasynyń nazarynda boldy.
Saıysta ushqyrlyǵymen, bilimdiligi, tapqyrlyǵy arqyly kózge túsip, qarsylastarynan oq boıy ozyq shyqqan QR Joǵarǵy Sotynyń mamany Arystanbekov Nurdáýletti qazylar alqasy jeńimpaz dep tanyp Bas júlde 350 myń teńgeni qanjyǵasyna baılady. Al, birinshi oryn 200 myń teńge QR Memlekettik kúzet qyzmetiniń ofıseri Ábdiramanova Gúljaınanyń úlesine tıip, ekinshi oryn 150 myń teńge QU Ulttyq bankiniń bas mamany Óskenbaeva Áıgerim enshilep, úshinshi oryn 100 myń teńgeni QR Densaýlyq saqtaý mınıstrliginiń sarapshysy Muhametbek Baqjan ıemdendi. Sonymen qatar, kórermenniń kózaıymyna aınalǵan QR Ádilet mınıstrliginiń sarapshysy Qýanyshbek Shynar men Respýblıkalyq búdjettiń atqarylýyn baqylaý jónindegi esep komıteti, Personaldy basqarý jáne aqparattyq qaýipsizdik bóliminiń sarapshysy Ábiltaev Ǵabıt 50 myń teńge yntalandyrý syılyǵyn aldy.
Bas júldeniń ıegeri Arystanbekov Nurdáýlet qýanysh qushaǵynda turyp, oıymen bólisip: «Búgin áriptesterimniń arasynda úzdik dep tanylyp, jeńimpaz atanǵanyma bek qýanyshtymyn. Mundaı saıystar bizdiń jigerimizdi janyp, tabystarǵa jetýge qulshyndyratyny sózsiz. Ásirese, «Til sheberi» baıqaýynyń jeńimpazy bolý ońaı emes eken. Jan-jaqty úsh tildi erkin meńgerý búgingi kúnniń basty talaby ekenin uǵynyp kelemiz. Janǵa shýaq, kóńilshe qýat berip, táýelsiz elińniń bolashaǵy jolynda eńbektenýge jeteleıtin osyndaı saıystardyń jalǵasyn taýyp jatsa nur ústine nur emes pe. Baıqaýdy uıymdastyrýshylarǵa degen alǵysym sheksiz» dep sózin túıindese, saıys úmitkeri QR Investısıalar jáne damý mınıstrliginiń bas sarapshysy Seıilhan Ádilbek óz pikirin alǵa tartty: «Men osymen ekinshi jyl qatarynan qatysyp otyrmyn. Bylaısha aıtqanda baıqaýdyń «aqsaqalymyn». Men júldege ilikpeı qalǵanyma esh ókinbeımin. «Júre-júre kópti kóresiń» degendeı, qaıta kóp nárseni úırendim. Shyńdalý mektebinen ótip jatyrmyn dese de bolady. Meniń usynysym «Ónertanym» dep atalatyn úshinshi bólimdegi úsh tilde jańyltpash oqýdyń ornyna basqasha bir qyzyqtyraq, bilimińdi anyqtaýǵa baǵyttalǵan saıys bolsa eken deımin. Sodan keıin úmitkerlerdiń oılanýyna ári jaýap berýine beriletin alty mınýt ýaqyt óte kóp sekildi. Bolashaqta osy usynystardy uıymdastyrýshylar qaperine alady degen oıdamyn. Jalpy, baıqaýdyń maqsaty, baǵyty óte durys»
Sóıtip, qyzyqty, tartysty ótken saıys máresine jetti. Baıqaýǵa qatysqan barlyq úmitkerler alǵys hattarmen marapattalyp, gúl shoqtary usynyldy. Klara Tólenbaeva, Rústem Nurjigit, Murat Qoja, Aıgúl Qosanova, «Gúlder-aı» bı ansambili sıaqty ónerpazdardyń qatysýmen konsert qoıylyp, qatysýshylar men kórermenderdi bir serpiltip tastady.
