Qazaqstan Respýblıkasy Úkimetiniń 2017 jyly 13 mamyrda qabyldanǵan qaýlysyna sáıkes Aqmola oblystyq fılarmonıasyna Úkili Ybyraıdyń esimi berildi, dep habarlaıdy Qamshy.kz aqparat agenttigi Aqmola oblysy ishki saıasat basqarmasynyń Óńirlik komýnıkasıalar qyzmetine silteme jasap.

Klasıkalyq halyq mýzykasynyń belgili ókilderiniń biri, sýyryp salma aqyn, belgili ánshi – Úkili Ybyraı Sandybaıuly kedeı sharýa otbasynda týǵan. Ol qazaqtyń ataqty ánshi-aqyndary Arystan, Orynbaı, Shal aqyn, Segiz seri, Tezekbaı, Shóje, Nurkeı, Birjan sal, Aqan serilerdiń ánderin, aıtystaryn el arasynda taratyp, mynaý Birjannyń, mynaý Aqannyń dombyrany qoldaryna alǵandaǵy óz yrǵaǵy, óz qulaq kúıi dep, árqaısysyn óz áýezimen, óz áýenimen, sarynymen oryndap bere alǵan.

Úkili Ybyraıdyń halyq arasynda keń taraǵan «Gákký» áni shyǵarmashylyǵynyń shyńy bolyp tabylady. Onyń ánderi názik, taza mahabbat sezimine, tereń oıǵa toly.

Týǵan eli Ybyraıdy óz júreginde saqtap, keıbir ánderin halyq áni dep, keıbirin áldekimdiki dep alyp qalǵan. Bul kúnderi ánderi ózine qaıtarylyp keledi.

Táýelsiz Qazaqstan aqyn ulyna qushaǵyn keńinen ashty. Kókshe topyraǵynda dúnıege kelgen halyq kompozıtory, bulbul ánshi, sýyryp salma aqyn Úkili Ybyraıdyń esimi búginde osy qaladaǵy Aqmola oblystyq fılarmonıasyna berildi.