Jas jigit syrqat haldegi anasynyń tilin almaı qajylyq saparǵa attanbaqshy boldy. Sheshesi: «Balam, men saýyqqan soń barǵanyń durys. Jınaǵan aqshańmen meni emdetseńshi!» dese de: «Alla jolyna jumsaımyn dep jınaǵan óz aqsham, qalaı jumsaýdy ózim bilemin!» dep, qajylyqqa barýdy óz anasynyń jaǵdaıynan artyq kórdi. Sóıtip, qajylyqqa anasynan ruqsat bata almaı attanyp ketti. Anasy ulyna qatty renjıdi. Álgi qajylyqqa sapar shekken jigit túndeletip jol boıyndaǵy bir aýylǵa keldi de, meshitke túneýdi durys kórdi. Sóıtse, sol aýyldan urlyq istep dándegen bireý, dál sol túni bir úıge túsip, asyl dúnıelerin urlap qashypty. Ákki ury aýyldyń meshitine tyǵylyp, odan terezeden shyǵyp izin jasyrady. Sezip qalǵan aýyldyń jandarmdary álginiń izine tússe, meshitke kirip sonda jasyrynǵanyn biledi. Jandarm aýyl adamdaryn jınap kelip, meshitti túgel qorshap uryny ustamaq bolady. Baspalap kirse mıǵrapqa tyǵylyp uıyqtap jatqan jas jigittiń ústinen túsedi. «Naq urynyń ózi osy!» deıdi. Sotqa tartady, jigittiń dálelin, ózin ózi aqtaǵanyn eshkim qulaǵyna ilmeıdi. Talaı jyl aýyldy zarlatqanyń úshin dep, eki kózin shyǵaryp, esekkke teris mingizip, kóshe-kósheni aralatyp: «Mynaý pálen jyl aýyldyń múlkin urlaǵan qarabet ury!» dep, jurtqa áshkere etedi. Sonda jigit: «Joq, bul anasynyń tilin almaı qajylyqqa attanǵan aqymaq, dep aıtyńyzdarshy!» dep, jalyndy. Biraq, alyp júrgender onyń bul aıtqanyna senbeıdi. Aqyry, eldi aralatyp bitken soń, uryny jol shetine laqtyryp ketedi. Jigit bolsa, álgi sózin aıtýmen alaqanyn jaıyp, qaıyrshyǵa aınalady. Júre-júre óz úıine keledi. Anasy esik aldyna shyqqanda, eki kóziniń ornynan qan tamshylaǵan, taıaqtan ústi-basyn jaraqat basqan, bir qolynda taıaq, bir qolyn qaltyraı jaıǵan óz ulyn kórdi. Balasynyń bıshara halge túskenine ókinishten ózegi órtendi. Sonda, anasynyń kókiregine ǵaıyp úni estildi: «Qajylyqty nıet etkeni úshin ǵana onyń jazasyn jeńildettik. Áıtpegende, eki qolyn da, eki aıaǵyn da alar edik!» Anasy shúkir etti, eki qoly men eki aıaǵyn alǵanda osylaı qaıyr surap júrýge de shamasy kelmes edi ǵoı dep...
Anasynyń razylyǵyn ala almaǵan adamǵa, Allanyń razylyǵy emes, tek ashýy laıyq bolatyny, Jaratýshynyń sheksiz ádildiginen habar beredi.
