12 jastaǵy almatylyq výnderkınd Abzal Myrzashtyń Qazaqstan-Brıtan tehnıkalyq ýnıversıtetinde bilim alyp kele jatqanyna da birneshe aıdan astam ýaqyt ótti. Jasynyń kishiligine qaramastan, ol ózimen qatar balalardy basyp ozyp, mektep baǵdarlamasyn jedel támámdaǵan edi. Endi tipti, ózi túsken JOO-n da jyldamdatyp aıaqtaýdy kózdep otyr. Oǵan qosa, oqýyn shetelde jalǵastyrýdy armandaıdy.

Onyń ýnıversıtet qabyrǵasyndaǵy ómiri men alǵa qoıǵan josparyn surap-bilý maqsatynda Qamshy.kz aqparat agenttiginiń tilshisi Abzaldyń úıine baryp qaıtqan edi. Suhbatty nazarlaryńyzǵa usynamyz:

-Mektep pen JOO-da oqýdyń ne aıyrmashylyǵy bar?

-Árıne, ýnıversıtettiń oqý baǵdarlamasy mektepten áldeqaıda qıyndaý. Sabaqtar qyzyǵyraq jáne tek ózińniń mamandyǵyńa qatysty pánderdi ǵana úıretedi. Oǵan qosa, munda ózińdi erkin sezinesiń, máselen, mekteptegideı forma kıetin qatal erejeler de joq.

-Ýnıversıtetke kelgen ýaqytta ne nársege úırený saǵan qıyndyq týǵyzdy?

Maǵan programmalaý páni óte qatty unaıdy. Biraq, bas kezde bul pándi úırenip ketý maǵan azdap qıyndyq týǵyzdy. Programmalaý boıynsha, men naqty eshteńe bilmeıtinmin. Sol úshin men onymen kóbirek aınalystym. Nátıjesinde, aralyq baqylaýlardan keıingi synaqtardan óte joǵary degen (100%) kórsetkishke ıe boldym.

-Aqparattyq tehnologıalar mamandyǵyn tańdaýdy toǵyzynshy synypta sheshtiń, qazirde osy mamandyqtan dáris alyp júrsiń. Saǵan ekinshi ret tańdaý berse, bul mamandyǵyńdy aýystyrar ma ediń?

-Maǵan aqparattyq tehnologıa mamandyǵy jáne oǵan qatysty oqytylatyn pánder unap jatyr. Sondyqtan, bul mamandyqty tańdaǵanyma ókinbeımin.  

-Jaqynda ǵana ýnıversıtettegi synaqtardan súrinbeı óttiń dep estidik, aralyq baqylaý sen úshin qıyn bolmady ma?

-SHúkir, barlyq sabaqtardy jaqsylap aıaqtadym. Asa qatty qıyndyq týǵyzdy dep aıta almaımyn.

-Bir topta oqıtyn stýdenttermen aradaǵy qarym-qatynasyń qalaı? Jańa dostar taba aldyń ba?

-Bastapqy bir-eki aptada azdap yńǵaısyz boldy. Sebebi barlyǵy bir-birin tanymaıdy. Odan keıingi ýaqyttarda ǵana biz etene aralasa bastadyq. Men de biraz dostar taptym. Bizder jalpy dáris oqylǵanda aýdıtorıada 80 adam bolyp otyramyz, al semınarlarda 10-15 stýdent qalady. Aqparattyq tehnologıalar (IT) mamandyǵy bolǵandyqtan, tobymyzda uldar basym.

-Muǵalimderdiń saǵan degen qarym-qatynasy qandaı, olar saǵan erekshe kóńil bóledi me?

-Muǵalimder maǵan barlyǵyna birdeı qaraǵandaı qaraıdy. Olar sabaqty óte qyzyqty ótedi. Leksıa aǵylshyn tilinde ótkenmen, olar qol jetimdi, túsinikti tilmen jetkizedi.

-Synyptastaryńdy saǵyndyń ba? Olarmen áli aralasyp turasyń ba?

-Synyptastarmen, aýladaǵy dostarymmen aralasyp turamyn. Olar keı kezde túsinbegen suraqtaryn surap turady.

-Bos ýaqytyńda nemen aınalysasyń?

-Men qazir óz sheshimim boıynsha, inimmen birge boksqa qatysyp júrmin. Aptasyna úsh ret bolady. Ustazym TMD jáne slaván elderiniń chempıony, álemde ony áıgili Mennı Pakáony uryp-jyqqan boksshy retinde tanıtyn Serikjan Eshmaǵambetov. 

Sýrette Abzaldyń anasy Jazıra Jarmaǵambetqyzy jáne inisi Sultan

-JOO-n da merziminen buryn bitirý týraly aqparatty estidik, bul oıyńdy ýnıversıtet tarapy biledi me? Olardyń oıy qalaı?

-Osy semestrde ekinshi kýrstan bir sabaq alǵan bolatynmyn. Basynda bir sabaq qana aldym, qatty qıyn bolyp ketpesin dep. Birtindep qosamyn, ekinshi semestrde odan da kóbirek qosamyn dep otyrmyn. Jedeldetilgen túrde, ıaǵnı 2,5-3 jylda oqyp bitirgim keledi. Ýnıversıtet tarapy bul týraly habardar.

-Seniń eń myqty qasıetiń ne?

Men kishkentaı kezimnen bastap, aınaladaǵy zattarǵa qatty zeıin qoıyp qaraıtynmyn. Meniń oıymsha, qyzyǵýshylyq pen este saqtaý qabiletimniń arqasynda jaqsy oqımyn dep oılaımyn.

-Saǵan tanymal bolǵan unaıdy ma?

-Negizi, basqalardyń nazarynda bola bergen onsha unamaıdy.

-Alǵa qoıǵan maqsatyń qandaı?

-Qazaq-Brıtan tehnıkalyq ýnıversıtetin bitirgennen keıin, bálkim jedeldetip, Alla buıyrtsa, AQSH-tyń Massachýsets shtatyndaǵy MIT (Massachusetts Institute of Technology) ınstıtýtyna túskim keledi. Onda magıstratýra mamandyǵyn ıgersem degen oıym bar.

-Sen ýnıversıtetti bitirgende 15-te bolasyń, sonaý AQSH-qa jalǵyz barýǵa júreksinbeısiń be?

Men jalǵyz emes, ata-anamdy da ózimmen birge alyp ketkim keledi. Árıne ony ýaqyty kelgende kóre jatarmyz...

Suhbatyńyzǵa raqmet!

Suhbattasqan: Zamıra Pýlatova